تاند- نن /دوشنبه/ ناوخته د هرات ښار د ګازو په زېرمتون یا ترمینل کې اور ولګېد چې لمبې یې د ښار له لېري برخو لیدل کېږي.
لومړني راپورونه وايي چې پېښه د ښار د دهنه کمر کلاغ په سیمه کې شوې او د اور له بلېدو وروسته پر له پسې چاودنې اورېدل شوي دي.
تراوسه پوري د اور لګېدو له امله د احتمالي مرګ ژوبلو کوم راپور نه دی ترلاسه شوی.
د اور لګېدو علت هم تر دې دمه نه دی څرګند.
د اور لګېدو سیمه د افغانستان لوېدیځو ولایتونو ته د ګازو د توزیع اصلي مرکز ګڼل کېږي.
وروستی خبر
د وروستیو راپورونو له مخې د هرات امنیه قومندان عبدالروف احمدي وايي، په دې پېښه کې ۱۱ تنه مړه شوي او ۱۸ نور ژوبل دي.
د اور لمبې تر شپږو ساعتونو پوري بلې وې.
لا هم څرګنده نه ده چې اور ولي ولګېد.
د دې پېښې له کبله څو کورونه هم سخت زیانمن شوي دي ځکه چې د ګازو دا زېرمتون په هستوګنه سیمه کې دی.