تاند- د یونان کریت ټاپو ته نژدې نن /جون ۳/ د پناه غوښتونکو یوه بېړۍ، چې ۷۰۰ تنه پکې سپاره ول، چپه شوه.
ګومان کېږي چې د بېړۍ په سپرلیو کې به افغان پناه غوښتونکي هم شامل وي. دا بېړۍ د کریت ټاپو د جنوب په ۷۵ کیلومترۍ کې ډوبه شوې ده.
د مهاجرت نړیوالې ادارې وویل چې تر ۳۴۰ زیات کسان ژغورل شوي خو د چپه شوې بېړۍ اکثره غړي لا هم بې درکه دي.
ژغورونکو تراوسه پوري ۴ مړي موندلي او د نورو کسانو د موندلو لپاره هلوځلو ته دوام ورکوي.
د مهاجرت نړیوالې ادارې په یوه اعلامیه کې ویلي چې د اپریل له میاشتې را په دې خوا به دا د یونان په اوبو کې د پناه غوښتونکو لپاره لومړنۍ پېښه وي.
د مارچ په میاشت کې د ترکیې او اروپايي اتحادیې ترمنځ د کډوالو د مخنیوي په باب لانجمنې موافقې یونان او اروپا ته د پناه غوښتونکو په تګ کې زیات کموالی راوستی دی.
د یونان ساحل ساتونکي وايي چې په دې ۲۵ متره اوږده بېړۍ کې، چې د کب نیونې لپاره ده، تر اندازې زیات کسان سپاره شوي ول.
ویل شوي چې پناه غوښتونکي ایټالیا ته وړل کېدل.