تاند- په فاریاب ولایت کې پر یوه واده د راکټ د لګېدو له کبله لږترلږه ۱۲ تنه ووژل شول.
د فاریاب امنیتي چارواکي وايي، په دې حمله کې، چې د خواجه سبز پوش ولسوالي په کوسه قلعه کلي کې پرون /پنجشنبه/ وشوه، ۳۰ نور ژوبل شوي دي.
په وژل شویو کې ۵ ماشومان او ۶ ښځې دي.
ویل شوي چې د پېښې ټول قربانیان عام خلک دي.
دولتي چارواکي وايي، راکټ د دولت د وسله والو مخالفانو له لوري ویشتل شوی دی.
وسله والو طالبانو تراوسه پوري په دې اړه څه نه دي ویلي خو راپورونه وايي چې په دې سیمه کې له ۴ ورځو راهیسي د امنیتي ځواکونو او طالبانو ترمنځ خونړۍ نښتې شوي دي.