تاند- د نړۍ د لمریزې انرژۍ تر ټولو ستر برېښناکوټ په سپټمبر میاشت کې په هند کې افتتاح شو.
د دغه برېښنا کوټ له جوړېدو سره هند په نړۍ کې د لمریزې انرژۍ په درېم ستر هیواد بدل کړ.
د ساینس مجلې د راپور له مخې، دا برېښنا کوټ، چې په ۱۰ کیلومتر مربع مځکه کې جوړ شوی، ۶۴۸ میګاواټه برېښنا تولیدولی شي.
هندیانو د تامل ناډو ایالت په کاموتي سیمه کې دغه برېښنا کوټ په په ۸ میاشتو کې په ۶۶۲ ملیون ډالره لګښت جوړ کړ.
تر دې پخوا د لمریزې انرژۍ تر ټولو ستر برېښنا کوټ په امریکا کې و، چې ۵۵۰ میکاواټه برېښنا یې تولیدوي.
هند، چې د صنعت د پرمختګ له کبله زیاتې انرژۍ ته اړتیا لري، هڅه کوي داسي انرژي زیاته تولید کړي چې چاپېریال ته لږ زیان لري.
په تامل ناډو کې د دغه ستر برېښناکوټ جوړېدو هند خپل دغه هدف ته یو ګام نژدې کړ.
هند د (National Solar Mission) په نوم د پروژې په پیلولو تر ۲۰۲۲ م کال پوري د ۲۰ ګیګاواټه لمریزه انرژي د ترلاسه کولو هدف ټاکلی و خو په ۲۰۱۵ م کال کې یې خپل هدف لا پراخ کړ او ویې ویل چې تر ۲۰۲۲ پوري به ۱۰۰ ګیګاواټه لمریزه برېښنا تولید کړي.