تاند- په ژمي کې له لارو او کوڅو څخه د معتادانو د راټولولو د کمپاین په لومړي پړاو کې نن /یکشنبه/ د کابل په لوېدیځ کې د پُل سوخته له لاندې په سلګونو معتادان د درملنې او ساتنې لپاره فینکس کمپ ته ولېږدول شول.
فینکس، چې پخوا په کابل کې د ناټو ځواکونو اډه وه، اوس د مخدرو موادو د معتادانو په درملځي بدل شوی دی.
امنیتي ځواکونو د عامې روغتیا د وزارت د مامورینو په ملتیا له پُل سوخته څخه ۴۰۰ تنه فینکس یا د هیلې احیا مرکز ته ورسول.
دغو کسانو تر پُل سوخته لاندې شپې سبا کولې او اوس چې هوا سړه شوې او لا هم پسې سړېږي، ژوند یې له جدي خطر سره مخامخ و.
په فینکس یا د هیلې احیا مرکز کې یو نیم زر تنه ځاییږي خو اوس یو زرو ۵۰ تنه پکې تر درملنې لاندې دي.
په دغه مرکز کې هر معتاد ۹۰ ورځې ساتل کېږي او که ډاډ ترلاسه شو چې په ۹۰ ورځې کې یې نشه پرې ایښې ده، عادي ژوند ته ستنول کېږي.
خو اکثره معتادان له درملنې وروسته بیا نشو ته پناه وړي ځکه چې د کورنۍ غړي ورته سمه پاملرنه نه کوي.
تر دې پخوا هم د پُل سوخته له لاندې ۵۰۰ روږدي ټول کړای شوي ول.
د روغتیا وزارت وايي چې د کورنیو چارو او له مخدرو موادو سره د مبارزې د وزارتونو په همکارۍ به په بل پړاو کې په بېلابېلو ولایتونو کې د معتادانو د ټولولو او درملنې لپاره هلې ځلې پیل کړي.