تاند- قرغیزستان وايي، د شانګهای د همکارۍ ټولنې د مشرانو په راتلونکې غونډه کې به، چې په بیشکیک کې جوړېږي، له افغانستانه د ناټو په مشرۍ د نړیوالو ځواکونو پر وتلو غور وشي.
د قرغیزستان د ولسمشر دفتر پرون وویل، د دغه هیواد په کوربه توب د شانګهای د همکارۍ ټولنې د مشرانو په غونډه کې به د دې ټولنې شپږو رسمي غړیو د مشرانو ترڅنګ د افغانستان، ترکمنستان، ایران او منګولیا ولسمشران همداراز د هند او پاکستان استازي ګډون وکړي.
په اعلامیه کې ویل شوي چې د غونډې برخوال به په دوو موضوعاتو بحث وکړي چې یوه یې له افغانستانه د نړیوالو ځواکونو وتل او بله سیمه ییز امنیت دی.
روسیه، چین، قرغیزستان، قزاقستان، ازبکستان او تاجکستان د شانګهای د همکارۍ ټولنې بشپړغړي هیوادونه دي.
دا هیوادونه اندېښنه لري چې له افغانستانه د نړیوالو ځواکونو له وتلو وروسته به د افغانستان امنیتي وضعیت خراب شي او یو وار بیا به ترهګر پکې ځالې جوړې او ناامني به منځنۍ اسیا او چین ته وغځوي.