تاند- د روسیې د بهرنیو چارو وزارت نن /جمعه/ وویل، امریکا ورته ویلي چې د افغانستان په اړه د مسکو د راتلونکې میاشتې په غونډه کې ګډون نه کوي.
روسیه د افغانستان، پاکستان، ایران، هند، چین او منځنۍ اسیا د هیوادونو په ګډون د افغانستان پر مسلو د خبرو لپاره د اپریل په ۱۴ مه په مسکو کې کنفرانس جوړوي.
د روسیې د بهرنیو چارو وزارت وویل چې مسکو لا هم د افغانستان په اړه د امریکا د نوي حکومت پر دریځ نه پوهېږي.
له بلې خوا پاکستان نن اعلان وکړ چې د افغانستان پر پخلاینه د خبرو لپاره د مسکو په غونډه کې ګډون کوي.
د پاکستان د بهرنیو چارو وزارت ویندوی نفیس زکریا د مسکو په کنفرانس کې د خپل هیواد ګډون تایید کړ.
امریکا وايي چې روسیه غالباً له طالبانو سره مالي او تسلیحاتي کومک کوي.