خبرپاڼه
نېټه١٣٩٢، ٠٦، ١٦
کندهار افغانستان– دکندهار ولايت په مېوند ولسوالۍ کي د وسلوالو طالبانو لخوا په يوه راغورځول سوي هاوان کي تېره شپه د ښځو او ماشومانو په ګډون د يوې کورنۍ (٦) تنو غړو ته مرګ ژوبله اوښتې چي څلور ښځي زخمياني او يو هلک او يوه انجلۍ شهيدان سوي دي..
د کندهار ولايت د ميوند ولسوالۍ د سوربغل په سيمه کي د ملي اردو د ځواکونو لخوا د وسلوالو مخالفينو د شومو اعمالو د مخنيوي او ددوي د ورانکارو پلانونو د شنډولو په موخه چاڼيز عمليات پيل سوي چي پر مهال يې تيره شپه وسلوالو طالبانو غوښتل چي د هاوان په راغورځولو سره د ملي اردو ځواکونه په نښه کړي خو هاوان په کور لګېدلي او ملکي خلکو ته يې مرګ ژوبله اړولې ده.
د افغان ملي امنيتي ځواکونو لخوا نوموړي زخميان روغتون ته انتقال سوي دي چي دا مهال تر درملني لاندي دي..
د يادوني وړ ده چي په تيرو کي هم دا ډول هاوان د وسلوالو طالبانو له خوا پر بيلا بيلو سيمو توغول سوى چي بيا د تحقيقاتو په نيتجه کي په ډاگه سى چي وسلوالو مخالفينو ته دغه ډول وسلې او هاوانونه چي له مځکي څخه مځکي ته ويشتل کيږي د سيمي د همسايه هيوادونو لخوا ورکول کيږي.