خبرپاڼه
نېټه: ١٣٩۶-۱-۱۷
کندهار، افغانستان- د ولايت مقام مرستيال عبدالحنان منيب نن سهار په ولايت مقام کي د مخابراتي شرکتونو له مسئولينو سره وکتل او له هغوی څخه يې د ځينو ستونزو په اړه وضاحت وغوښت.
ښاغلي منيب وويل چي د مخابراتي شرکتونو د همږغۍ غونډه به هره مياشت جوړوي څو د خلکو غوښتني او وړانديزونه له دوی سره شريک کړي. مرستيال والي وويل چي مخابراتي شرکتونه بايد ولسواليو ته فعاليت پراخ کړي، د انټرنيټ تر څنګ په خدماتو کي تخفيف راولي، د فرهنګي او تعليمي پروګرامونو په جوړولو کي همکاري وکړي، د نمبرونو په توزيع کي شفافيت رامنځته کړي، د مخابراتي انتنو لپاره د دولتي قراردادونو ماليات په درست ډول تحويل کړي او په کندهار کي مېشتو معيوبينو ته د بايسکلونو په ورکړه کي همکاري وکړي.
ښاغلي منيب ټينګار وکړ چي مخابراتي شرکتونه دي په خدماتو کي تخفيف راولي او په يادو برخو کي دي هر شرکت د وس تر حده مرسته وکړي.
د ولايتي شورا غړي حاجي نادر نورزي وويل چي افغان بيسيم په مزار ولايت افغان ډېر تخفيف راوستلی، په داسي حال کي چي د کندهار د اوسېدونکو اقتصادي حالت د نورو په پرتله کمزوری دی. هغه داراز وويل چي ډېر خلک له افغان بيسيم څخه شکايت کوي چي د نورو شرکتونو په پرتله يې د انټرنيټ پکېجونه ژر ختميږي.
د افغان بيسيم شرکت استازي وويل چي دوی په تېر کي هم په تعليمي، فرهنګي او نورو ښاري خدمتونو کي همکاري کړې ده، خو ليرو ولسواليو ته د خدماتو غځولو په وړاندي لوی خنډ ناامني ده. پر دې سربېره د خوښۍ زېری دا دی چي څو ورځي وروسته به په شاوليکوټ ولسوالي کي ۳جي انټرنيټ فعال کړي. هغه زياته کړه چي د ولايت مقام وړانديزونه يې له ځان سره ياداښت کړل او له مرکزي ادارې سره به يې شريک کړي.
د روشن مخابراتي شرکت ساحوي مسئول انوارالدين نور هم وويل چي ليرو ولسواليو ته د خدمتونو غځولو پلان لري او ژمنه يې وکړه چي په ټولنيزو خدمتونو کي به تر وسه ونډه واخلي.