تاند- د پاکستان صدراعظم پرون /جمعه/ وویل چې په کشمیر کې د بشري حقونو پر سرغړونو د امریکا چوپتیا نهیلی کړی دی.
نوازشریف دا خبره وروسته له دې وکړه چې د هند صدراعظم نریندر مودي د امریکا متحدو ایالتونو ته لاړ او امریکايي چارواکو یې تود هرکلی وکړ.
د ولسمشر ډانلډ ټرمپ او صدراعظم نریندر مودي د کتنې په پای کې د دواړو خواوو په ګډه اعلامیه کې له پاکستان څخه غوښتل شوي چې په خپله خاوره کې تروریستانو ته پناه ورکول او د ترهګرو پالنه پای ته ورسوي.
نوازشریف د مودي او ټرمپ په ګډه اعلامیه کې د هغه څه په وړاندې چوپتیا، چې نوازشریف په کشمیر کې د هندي ځواکونو ظلمونه بللي دي، غندلې ده.
نوازشریف پر امریکا د انتقاد ترڅنګ له چین او روسیې سره د خپل هیواد پر اړیکو رضایت څرګند کړ او چین یې د افغانستان او پاکستان ترمنځ د اړیکو د ښه کېدو لپاره د وروستیو هڅو په خاطر وستایه.
پاکستان په هندي کشمیر کې د یاغیانو پوځي، تسلیحاتي، لوژیستیکي او مالي ملاتړ کوي خو وايي چې د کشیمریانو یوازې اخلاقي او سیاسي ننګه کوي.
مخکې تر دې چې امریکايي پوځیان افغانستان ته راشي، پاکستان په سیمه کې د امریکا تر ټولو مهم او ستراتیژیک دوست هیواد و. امریکا ډېر کلونه په پاکستان (بډه بېره) کې اډه لرله.