د سياف غشي به کومه ماڼۍ په نښه کړي؟

د کرزي چکر تر سفر بريالى و

له پاکستان سره د افغان دولت اړيکې په تېرو څو کلونو کې کله هم په ثبات نه دى پاتې شوي، کله هم ترې د خواخوږۍ د نيت او کله د دښمنۍ له ادرسه يې انګېرنې شوې، د دواړو هېوادونو لوړپوړ…و چارواکو هر وخت راشه درشه ساتلې، خو هغه خبرې تل په کاغذونو کې پاتې کېدې، چې افغان دولت يې غوښتنه کوله او افغانانو ته يې هيلې ورکولې، خو اسلام اباد ته د ولسمشر کرزي وروستۍ سفر چې د مري تر چکره وغځېده ترې د سولې په تړاو تمې پيدا شوي.

دکرزي دا سفر ځکه ترنورو ډير دپام وړ و چې دپاکستان دپخوانيو تجربو لرونکي بيا واک ته رسيدلي لومړي وزير نوازا شريف سره لومړۍ رسمي ليدنه وه او دکرزي د دورې وروستۍ موده بلل کيده سفر ته دشمير له مخې ډير خطاب کېده شلم سفر او دا ځکه چې نولس سفرونو وړاندې هيڅ کومه پايله نه درلوده، خواوس چې دپاکستان دملي امنيت سلاکار سرتاج عزيز وايي، په يوه مياشت کې به دننه ملابرادر د پاکستان له زندانه خوشي کړل شي او دسولې د مرکچي په توګه به يو بل اسلامي هېواد ته ولېږدول شي .

له دغه اعلان سره که ډېرې اندېښنې او شکونه هم ملګري دي ، ولې د ډېرو نظر دادى چې اسلام اباد دکرزي دوروستي سفر له اجندا يوه کرښه ومنله، کرزي په وار وار دملا عبدالغني برادر په ګډون دلوړ پوړو طالب زندانيانو دخوشې کولو غوښتنه کړې وه، ولسمشر په وروستي سفر کې چې يوه ورځنى و ترنور کله جدي ښکارېده، خو د نوازشريف په ټينګار يو شپه نور هم پاتې شو او دمري د سيالانيانو ځاى ته په تللو سره يې له نواز شريف سره له اجندا ډېرې خبرې وکړې، دکرزي له سفر وروسته ددغه هېواد دچارواکو څرګندونې هم حيرانونکې وې.

سرتاج عزيز وويل(( له ٢٠١٤ کال وروسته په افغانستان کې لاس وهنه نه کوي))

او ((پاکستان له هغه فکرنه په تېرېدو دى چې افغانستان دې خپل پنځمه برخه وګرځوي))

دغه چارې که څه هم د باور تر بريده د خلکو په منځ کې ځاى نه دى کړى، ځکه تېر تکرار ته په کتو دپاکستان هر ګام ته دشک په سترګه کتل کېږي، خو دکرزي دسفر په تړاو يې د ډېرو پام ځان ته را اړولى او شننې دادي، چې ښايي امريکابه هم د خپلو ګټو لپاره پاکستان ته د دا ډول کارونو سپارښتنه کړې وي .

د سياسي چارو شنونکى او افغان ژورناليست ولي الله شاهين وايي :((هغه څه چې امريکا يې پلان لري دپلې کولو لپاره يې خپل وخت شته اوس نو امريکا اوپاکستان دواړه دې ته اړ دي چې د طالبانو سره له روغې جوړې کار واخلي او دغه مجبوريتونه دي امريکا بله لاره نه لري ،هغه که دکرزي په غوښتنه وي او که دبل چا، بله دا چې پاکستان نور نوپه دې پوهېدلى ، چې هم يې له افغان دولت سره په چل وخت تېر کړى او هم له طالبانو سره، اسلام اباد غواړي په دې حالاتو کې خپله پاليسي بدله کړي، خو بيا هم ورسره دامريکا مشوره حتمي ده. ))

دکرزي په اجندا کې دا غوښتنه هم وه ،چې دسولې په تړاو به پاکستان له خپله اړخه مسولانه ګام پورته کوي، خو اوس چې دپاکستان نظر په ښکاره بدل ښکاري او غواړي دسولې په اړوند هلې ځلې غښتلي کړي، بېلګې يې په دوبۍ اوقطر کې اوس مهال دځينو طالب مرکچيانو سره دامريکايانو مخامخ ليدنې او ناستې دي، چې غواړي په يوه ګډه سوله ييزه طرحه کار وکړي، په داسې حالاتو کې يو بله لويه ننګونه په کور دننه د ځينو پخوانيو جهادي مشرانو څرګندونې دي، هغه مشران چې ولسمشر ته له نږدې سلاکارانو شمېرل کېږي.

دشهيدانو د اونۍ په پلمه کابل کې جوړې شوې يوې لويې غونډې ته يې عبدالرب رسول سياف وويل، طالبان پردي مزدوارن دي او له مزدورانو سره سوله نه کېږي، سياف طالبان دافغانستان او اسلام دښمنان وبلل، دغو څرګندونو وېره پيدا کړې چې ښايي په طالبانو کې دسولې په تړاو راټوکېدلى ذهنيت کمزورى کړي.

کتونکي په دې اند دي چې ګنې دسياف څرګندونې له شعوره وې او دغه څېرې غواړي سولې ته دطالبانو د ګډون مخه ونيسي .

دنظر خاوند ادريس غروال وايي استاد سياف دطالبانو پخوانى رقيب دى ،دى او ډله يې کله هم له طالبانو سره روغه نه غواړي او تردې وخته چې دسولې هڅې پڅې دي، ولسمشر کرزي او امريکايان ته دسياف په ګډون دشمال ټلوالي پخواني قومندانان همدا ډول مشورې ورکوي، چې له مخې يې دسولې څرګند ادرس ورک دى .

، خو دا ځل چې امريکا،ولسمشر کرزى او ښکېل هېوادونه دسولې په برخه کې جدي ښکاري، د ټلوالې دمشرانو هڅې به پايلې ولري کنه! ؟

له باور ورځپاڼې څخه په مننې