تاند- د پاکستان لوی درستیز نن /یکشنبه/ په ارګ کې د افغانستان له ولسمشر محمد اشرف غني سره د سیمه ییز امنیت، دوه اړخیزو اړیکو، له تروریزم سره مبارزې او سولې په اړه خبرې وکړې.
ارګ وايي، د پاکستان د پوځ لوی درستیز جنرال قمر جاوید باجوه او ورسره ملګري پلاوي ژمنه وکړه چې هیواد یې له تروریزم سره د مبارزې په برخه کې هر راز همکارۍ ته تیار دی او چمتو دی چې د افغانانو په مالکیت او مشرۍ د سولې د میکانیزم ملاتړ وکړي.
د ارګ په خبرپاڼه کې ویل شوي چې پاکستاني پلاوي همداراز ژمنه وکړه چې کاري ټیمونه به پر عملي او تطبیقي پلانونو کار وکړي.