افراسیاب خټک: پاکستان، په اسلام اباد کې د افغانستان د دولت پر ضد موازي حکومت کېنولی

تاند، جمعه، د جدي ۶مه: په کوزه پښتونخوا کې د ملي عوامي ګوند پخوانی مشر غړی او د پاکستان پخوانی سناتور افراسیاب خټک د پاکستان پوځ په افغانستان کې ولسواکي نه غواړي، بلکې ټوله لاره طالبانو ته خلاصول غواړي.

افراسیاب خټک له امریکا غږ سره په فیسبوک لایف مرکه کې وویل، د طالبانو مربیون پاکستاني پوځي مشران پر دغه ډله بشپړ نفوذ لري او دغه هېواد د افغانستان د نظام پر ضد د طالبانو یو موازي حکومت په اسلام اباد او کویټه کې کېنولی دی.

نوموړی وايي، پاکستان په افغانستان کې له ولسمشریزو ټاکنو سره خوشاله نه دی، بلکې خپلې ټولې د امید هګۍ یې د طالبانو په ټوکرۍ کې اچولې دي او د هغوی د بیا حاکمولو خوبونه ویني: (( اوس د اقتصادي همکاریو زمانه ده، خو پاکستانی پوځ هر څه د جیو ستراتیژیک زاویې ګوري، اوس په دوی کې هم اختلاف دی، ځینې یې طالبان واک ته رسول غواړي، ځینې وايي چې نه یوازې دوی حکومت کې شامل کړئ، ځکه بیا که دوی افغانستان کې واکمن شول، پاکستان کې به هم د پخوا په څېر طالباني تحریکونه وده وکړي.))

نوموړی وايي، د پاکستان حکومت په نااعلان شوي ډول له مودو راهیسې د پوځ له لوري چلول کېږي او دوی یوازې په افغانستان کې نه بلکې په پاکستان کې هم ولسواکي نه غواړي: (( پاکستان د افغانستان د ستراتیژیک عمق سیاست نه دی پریښی، دوی افغانستان ته داسې جنګي ماشینونه جوړوي، چې په سیاست نه پوهېږي، مجاهدین او طالبان همداسې خلک دي، حتی طالبان دوه ورځې اوربند نه شي اعلانولی، نه دوی په سیاست پوهېږي.))

افراسیاب خټک د طالبانو د سولې په اراده هم شکمن دی او وایي، دا خلک په سیاست د نه پوهېدو له ډاره له جګړې او تشدد څخه راوتلی نه شي: ((طالبان له تشدد څخه راوتلي نه دي، ټوله اتکا یې به جګړه ده، که طالبان جدي وای، دوی باید سیاست زیات کړی وای، کومې سیمې یې چې تر کنټرول لاندې دي، هیڅ یې په کې نه دي کړي، نه یې د ولس زړه ګټلی دی، طالبانو ته بله طریقه نه ورځي، دوی فقط جنګ زده دی، مجاهدین هم په سیاست کې کامیاب نه وو.))

 ښاغلي خټک د روانو مذاکراتو له چوکاټ سره هم مخالفت وښود او زیاته یې کړه په دې مذاکراتو کې طالبانو د دولت حاکمیت نه دی منلی نه یې هم تاوتریخوالی راکمول منلي دي.

نوموړی وايي، روان مذاکرات د امریکا د وتلو لپاره مذاکرات دي، د مصالحې مذاکراته نه دي: (( مذاکرات د څلورو ټکو لپاره وو، د امریکا وتل، القاعده سره د طالبانو اړیکه شکول، حکومت سره خبرې او اوربند، اوس طالبان حکومت د بل ګوډاګی بولي، حال دا چې ټول طالبان په پاکستان کې ناست دي.))

نوموړي پر افغان حکومت غږ وکړ چې د سولې لپاره یوه داخلی غښتلې اجماع رامنځته کړي تر څو یې خبره نور هم قوت پیدا کړي.

 افراسیاب خټک د افغانستان او افغانانو په ملاتړ کې مشهور د کوزې پښتونخوا سیاسي فعال دی چې تل یې د افغانستان په اړه د پاکستان د پوځي پالیسیو په زغرده غندنه او مخالفت کړی دی.