افغانان باید نور ویښ شي/ ولي احمد

د څو ورځو یا اونیو په اوږدو کې افغانستان د ډېرو غمجنو حادثو شاهد دی، د دغو وحشتناکو حوادثو د عملي کېدو بڼه لږه نوې او کم سارې ده ، دا پېښې څه تصادفې نه دي بلکې پلان شوې منصوبې دي چې زمونږ په ګران هېواد کې د دښمن له خوا ترتیب او عملي کېږي، او زه ګومان کوم چې دا ډول وحشتناکې پېښې به لا پسې دوام وکړي ، ځکه چې دښمن د افغان ولس د جوزا د څلوریشتمې فیصلې ډېر زیات وارخطا کړی او اوس خپلو موخو ته د رسېدو لپاره د هر نوعه پرېوتي او له انسانیته لرې هر عمل ارتکاب ته ذهنا او عملا چمتو دی.

دښمن غواړي افغانستان په خپل منځي قومي جنګونو اخته کړی، د پښتون تاجک د خپل منځي جنګ لپاره یې ډېره سرمایه لګولې ده، خو چونکه د پښتون تاجک ترمینځ مذهبي اختلاف نشته بلکې دواړه سني مذهبه دي ،نو په دې اساس د دوی جنګ ژر نه تودېږي او که ونښلي بنیاد یې کمزوری دی ،نو ژر سړيږي . خو د سنی شیعه اختلاف لپاره دوه اساسه دي :

یو قومي بېلوالی او بل مذهبي بیلوالی . دښمن غواړي له دې لارې د افغانستان دوه معزز قومونه سره په جنګ واچوي ، افغانستان کمزوری کړي او خپلو موخو ته ورسېږي، اوس نو د افغان دولت ، د ذکر شویو قومونو مشرانو او ټولو روشن فکره خلکو ذمه واري ده چې دغه ستونزه څرنګه حلوي .

دا خبره چې د غور قربانیان د طالبانو له لاسه نه دي وژل شوي دا یوه بې اساسه خبره ده ، طالب د بهرنیو استخباراتي کړیو د لاس مهره ده او په اصطلاح ټيشو پیپر دی. دغه کړۍ چې کله او څنګه وغواړي طالب استعمالولای شي، بله دا چې طالب په نظریاتي او سنګري لحاظ سره د سپاه صحابه انډیوال دی او سپاه صحابه د شیعه په ځانګړي ډول د هزاره شیعه سرسخته دښمن دی، که په لوړه سطحه نه وي د طالبانو د ټیټې کچې افراد خو ذهنا او عملا د دوی ملګري دي، دلته به زه یوه واقعه ولیکم چې زما د دغې خبرې لپاره یو نوعه دلیل ده: کله چې طالبانو بامیان ونیوه ، ډېری هزاره وګړي هم ورسره ملګري شول، خو طالبانو په پرې باور نه کاوه، د جنګ محاذ ته به یې بوتلل خو وسله به یې ورته نه ورکوله بلکې د موضع ګانو او مورچلو په کېندلو کې به یې ترې کار اخیسته ، قاري ضیاءالرحمن د مولوي خالص د ورېرې زوی د طالبانو جنګي قومندان و او شاید اوس هم د دغې لارې لاروی وي ،خپله کیسه کوي چې څنګه یې دوه هزاره د موضع د جوړولو په پلمه اول خط ته بوتلل ، هلته یې پرې ځمکنۍ موضع جوړه کړه،بیا یې بل ملګري ته اشاره وکړه هغه هوايي ډزې پیل کړې، ده دغو هزاره و ته وویل چې خطره ده،شورای نظار ډزې کوي ،نوتاسې دغې موضع ته کوز شئ ، هغوی دواړه موضع ته کوزېږي او د بره پرې دوی ډزې وکړي او دواړه ځای پر ځای مړه کړي او د پاسه پرې هماغه د موضع خاورې کاڼي واچوي. دا ډول فکر په عامو طالبانو کې شته ، نو که دوی انکار هم وکړي کار د همدوی دی. په نني عصر کې هره اسلامکاره ډله د خپلو ځینو کړنو پړه په غاړه نه اخلي اګر که په خپلو خاصو مجالسو کې دغه کار به د ځان لپاره ویاړ او افتخار ګڼي، د مثال په ډول لشکر طیبه د ممبیي د پېښې پړه نه مني خو په خاصو مجالسو کې یې د ځان ستره کامیابي مني او په خوشالۍ کې خواږه،یعنې مټایي ویشي. د افغانانو په مخ کې نور ستر مشکلات پراته دي ، په نژدې ورځو او اونیو کې به په نورستان، کنړ او ننګرهار کې نوي جنګونه شروع کېږي، ای ایس ای لګیا ده غواړي د سلفي طالبانو جبهه قوي کړي ،ځکه چې حنفي طالبان د پاکستاني طالبانو سره یو څه نا څه خواخوږي لري خو برعکس د سلفي طالبانو او طالبانو ترمینځ نښتې هم شوي ،بله دا چې په نورستان او کنړ کې سلفي نظریه نفوذ لري او د کنړ سیند هم دلته موقعیت لري ، لشکر طیبه په پام کې لري چې دا محاذ لا زیات ګرم وساتي، د دې لپاره یې د حاجي جاویدالحسن په مشرۍ يوه ډله ګمارلې ده چې د نورستان او کنړ نه ځوانان جذب کړي ،نوموړی د پنجاب د ساهیوال اوسېدونکی دی ، اصلي نوم یې ریاض اسماعیل دی ، په روانه کونړۍ پښتو غږیږي ، په دري هم پوهیږي ، په کابل کې هم اوسېدلی،دلته به یې ځان د کنړي تجار په حیث معرفي کاوه، یوه مېرمن یې کابلۍ ده، د دوی پلان دی چې یوه مدرسه په دیر کې او بله په باجوړ کې د نورستاني ، کنړي او ننګرهاري طالبانو لپاره تاسیس کړي او نور طالبان بیا د لاهور مرکز طیبه ته بوځیاو د دې لارې دغه محاذونه ګرم وساتلی شي،په دې سلسله کې د دوی سره د شونکړۍ ملا امین الله پشاوري، حاجي حیات الله او عبدالرب او نورو خرڅ شویو کنړو، نورستانیانو او ننګرهاریانو همه جانبه مرسته شته. د لشکر طیبه په مدرسو کې اوس هم په ګڼ شمېر کې نورستاني، بدخشاني ،کنړي ، ننګرهاري او کندهاري طالبان شته،نو اوس دا د ملي امنیت او نورو امنیتي ځواکونو دنده ده چې د دښمن دغه شوم پلانونه شنډ کړي.