افغانه لوبغاړې: وسله والو مې سپی راوواژه، نور هېواد پرېږدم

تاند، دوشنبه، د دلوې ۲۱مه: هرات ولایت کې د کاراتې لوبغاړې صهبا بارکزۍ تر هغه وروسته چې سپی یې د وسله والو کسانو لخوا ووژل شو، اوس یې پرېکړه کړې چې هېواد پرېږدي.

صهبا بارکزی افغان لوبغاړې ده چې په هرات کې د کاراتې کلپ لري او  وايي، سپی یې د تېرې جمعې په ورځ په غره کې وسلوالو کسانو لخوا ووژل شو.

هغه وايي، د جمعې په ورځ خپل پلار او خور سره غره ته تللې وه او خپل سپی یې هم ځان سره بیولی و، چې د وسله والو لخوا په ډزو ووژل شو: (( پام مې شو چې وسله وال کس مې سپی په نښه کړی و، ژر مې د سپي خوا ته منډه کړه او چیغې مې کړې تر څو سپی مې ونه ولي، خو هغه سړی شپانه ته ورته و او زما سپی یې وویشت.))

مېرمن صهبا نه وایي چې وسله وال کس طالب و که نامسووله کس خو وايي: ((د سپي تر وژل کېدو مې هڅه وکړه چې له ځان سره یې یوسم، خو اجازه یې رانکړه، او راته وویل شول چې د نجونو له سپي سره څه کار، اجازه یې رانکړه چې له ځان سره یوسم.))

هغه وايي، تمه یې نه درلوده چې خپل سپی چې ډېر هم ورته ګران و، دومره ژر  له لاسه ورکړي.

صهبا وویل: ((ما په ګوګل کې د سپیانو د عمر په هکله پلټنې کړې وې، او هلته مې وموندل چې سپی تر څورلس کلونو پورې ژوند کوي، نو له ځان سره مې وویل چې څورلس کاله خو ډېر لږ دي، خو په دې نه پوهېدم چې خپل سپی به تر اوو میاشتو وروسته له لاسه ورکوم.))

هغه وايي، له خپلو شاګردانو سره یې مخه ښه وکړه، او اوس یې پرېکړه کړې چې هېواد پرېږدي.
ځکه په وینا یې فکر کوي چې نور دلته د ژوند کولو ځای نه دی.