اوباما او کرزي د سولې د خبرو لپاره د قطر دفتر ضروري وباله

تاند- د امریکا ولسمشر بارک اوباما او افغانستان ولسمشر حامد کرزي له طالبانو سره د سولې د خبرو د درول شوي پلان په اړه خبرې وکړې.

د سپینې ماڼۍ له یوې اعلامیې سره سم ښاغلیو اوباما او کرزی د سې شنبې په ورځ په ویدیو کنفرانس کې همداراز افغان امنیتي ځواکونو ته د افغانستان د امنیتي چارو د سپارلو په اړه هم وږغېدل.

دواړو ولسمشرانو دا خبرې ارګ ته نژدې د وسله والو طالبانو د سې شنبې د ورځې له حملې وروسته وکړې چې له کبله یې داسي اندېښنه پیدا شوې وه چې ممکن په قطر کې د سولې د بهیر لپاره رامنځته شوی فرصت له لاسه ووځي.

اوباما ظاهراً د افغانستان ولسمشر وروسته له دې له طالبانو سره د سولې خبرو ته وهڅاوه چې ده تېره اوونۍ په قطر کې د طالبانو پر دفتر د اسلامي امارت د لوحې په اعتراض کې قطر ته د پلاوي له لېږلو ډډه وکړه.

سپینه ماڼۍ وايي، اوباما او کرزي ټینګار وکړ چې د افغانانو په مشرۍ او د افغانانو په مالکیت د سولې او پخلاینې بهیر په افغانستان کې او سیمه کې د تلپاتې ثبات او د جګړې د پای ته رسولو تر ټولو مطمینه لار ده.

دوی په خپلو یو نیم ساعت خبرو کې د افغانستان د سولې د عالي شورا او د طالبانو د صلاحیت لرونکو استازو ترمنځ د خبرو په هدف په دوحه کې د دفتر ملاتړ وکړ.

دواړو مشرانو د روانې میاشتې په لومړیو کې له ناټو څخه افغان ځواکونو ته د عملیاتي مشرتابه د انتقال او د افغانانو په مشرۍ د پخلاینې د هلوځلو پر اهمیت، د ۲۰۱۴ کال انتخاباتو ته د افغانستان د تیاري، او د دوو هیوادونو ترمنځ د امنیتي تړون په اړه هم خبرې وکړې.

د سپینې ماڼۍ له اعلامیې سره سم ولسمشر کرزي د افغانستان د ۲۰۱۴ میلادي کال د انتخاباتو په اړه ولسمشر اوباما ته وروستي مالومات ورکړل. دواړو ولسمشرانو ازاد، شفاف او د اعتماد وړ انتخابات د افغانستان د راتلونکې لپاره حساس او مهم وبلل.

امریکا په وروستیو ورځو کې د افغانستان د مسلې د سوله ییز حل لپاره دیپلوماتیکې هلې ځلې تېزې کړي دي.

له ولسمشر کرزي سره د اوباما تر پرونیو ویدویويي خبرو مخکې د متحدو ایالتونو د بهرنیو چارو وزیر جان کیري له کرزي سره دوه ځلي ټېلفوني خبرې وکړې، وروسته یې د افغانستان او پاکستان لپاره خاص استازی جېمز ډابینز کابل ته واستاوه څو د ولسمشر کرزي هغه غوسه کراره کړي چې د قطر په دفتر کې د طالبانو د اسلامي امارت او بیرغ په وجه پارېدلې ده.

پرون په قطر کې د طالبانو سیاسي دفتر هم وویل چې د کابل حمله به د قطر د سولې پر بهیر اغېز ونه کړي.
په قطر کې د طالبانو د دفتر یوه غړي د پاکستان ایکسپریس تریبیون ورځپاڼې ته وویل چې د کابل حمله به د سولې دا پروسه زیانمنه نه کړي ځکه چې دا بهیر سیاسي دی او تراوسه پوري لا د طالبانو، امریکا او د کرزي د رژیم ترمنځ پر اوربند سلا نه ده شوې.

د طالبانو د دفتر دغه غړي، چې نوم یې نه دی ذکر شوی، د ټېلفون له لارې ایکسپریس تریبیون ورځپاڼې ته همداراز ویلي:«د قطر د سولې بهیر په حقیقت کې د دې ډول حملو د درولو او د نورو وینو د بهېدو د مخنیوي لپاره ده.»
ده همداراز وویل چې باید له هیڅ حملې څخه د سولې د بهیر د درولو لپاره د پلمې په توګه کار وانخیستل شي