تاند- په پکتیکا کې امنیتي چارواکي وايي، یوه سیمه ییز پولیس چې طالبانو نیولی و، مخکې تر دې چې د طالبانو له لوري ووژل شي، د دې ډلې شاوخوا ۲۵ غړیو ته مرګ ژوبله واړوله.
اول خان په خپله، په داسې حال کې چې په لاس کې یې یوه کړۍ لا پاتې وه، رسنیو ته وویل چې د پکتیکا ولایت په ګومل ولسوالي کې د طالبانو په اسارت کې و او کله چې هغوی د ده د وژلو په اړه پرېکړه کوله، د هغوی وسله یې ترلاسه کړه او له یومخې یې پر ټولو ډزې وکړې.
د پکتیکا ولایتي چارواکي وايي چې دا پېښه پرون /چهارشنبه/ ماښام مهال د پکتیکا په ګومل ولسوالي کې وشوه او اول خان بریالی شو چې د طالبانو موټر هم له ځان سره راوړي.
د اول خان ورور د سیمه ییزو پولیسو قوماندان دی او وايي چې د کورنۍ ګڼ غړي یې د طالبانو له لوري وژل شوي دي.
اول خان د پکتیکا د سروبي ولسوالي په رباط سیمه کې هغه مهال د طالبانو له لوري وتښتول شو چې په موټر کې کور ته روان و.
د طالبانو ویندوی د اول خان له لوري پر طالبانو ډزې تایید کړي خو وايي، هومره کسان هم نه دي وژل شوي چې نوموړی یې ادعا کوي.
دې ته وایې مېړانه ، توره او جهاد.
هم یې ځان وژغوره او هم یې د پنجاب پر مزدورانو غذا وکړه.