تاند- د بریتانیا د بهرنیو چارو وزیر د دوشنبې په ورځ د افغانستان د سفر په لړ کې له ولسمشر محمد اشرف غني، اجرايي ريیس عبدالله عبدالله، د بهرنیو چارو مرستیال وزیر حکمت خلیل کرزي او د افغانستان د سولې د عالي شورا ريیس پیرسید احمد ګیلاني سره ولیدل.
د بریتانیا د بهرنیو چارو وزیر د افغانستان د سولې د بهیر او څلور اړخیز ګروپ په اړه وویل، هیواد یې د افغانستان د سولې د بهیر ملاتړ کوي او د دغو خبرو د چمتووالي لپاره له افغانستان سره د یو ملیون او څلور لکه ډالره مرسته کوي.
ښاغلي هامند تاکید وکاوه چې بریتانیا د څلوراړخیزو خبرو ملاتړ کوي او باور لري چې افغانستان ته د سولې او ثبات د راوستلو یو مهم فرصت په لاس ورکوي او د افغانانو کړاوونه پای ته رسوي.
د بریتانیا د بهرنیو چارو وزیر د اصلاحاتو په برخه کې په ځانګړي ډول له فساد سره د مبارزې لپاره د افغانستان د حکومت ژمنه، چې د ۲۰۱۴ م کال په دسمبر کې یې د لندن په کنفرانس کې کړې وه، مهمه وبلله.
ده زیاته کړه:«خوشاله یم چې د بریتانیا د باندنیو چارو وزیر په توګه بیا افغانستان ته راځم. د بریتانیا حکومت ژمن دی چې له افغانستان سره خپل مشارکت ټینګوي. موږ به د افغانانو د لا سوله ییز، خوندي او سوکاله راتلونکي لپاره د افغانستان د حکومت ملاتړ ته دوام ورکړو.»
ده همداراز وویل:«دا د افغانستان لپاره مهم کال دی. په بروکسل کې د ناټو کنفرانس د افغانستان حکومت ته موقع برابروي چې نړیوالې ټولنې ته په خپلو اصلاحاتو کې د پرمختګ اجنډا بیان کړي څو نړیواله ټولنه له افغانستان سره پر خپلو ژمنو ټینګار وکړي.»
د بریتانیا د بهرنیو چارو وزارت د ویبپاڼې د راپور له مخې فلیپ هامنډ په کابل کې له بریتانیايي پوځیانو سره هم وکتل.
ده په کابل کې د بریتانیايي پوځیانو له قوماندان برید جنرالاین توماس، د ناټو د غوڅ ماموریت له قوماندان جنرال جان نیکلسن او په افغانستان کې د بریتانیايي پوځیانو له قوماندان جنرال ټیم فورد سره په افغانستان کې د بریتانیا پر غیرپوځي رول خبرې وکړې.
دا یو عشاریه څلورمیلونه ډالر دی نه یو سلو څلور میلونه دالره غلطی باید اصلاح شی
چی هر څومره مرسته اعلان شی مخکی ربانی خپل جب کی واچولی او اوس به یی پیر صاحب ګیلانی جب کی واچوی