تاند- مشهور امریکايي شناند مایکل روبین وايي، د دې لپاره چې په افغانستان کې د امریکا د سولې هڅې نتیجه ورکړي باید امریکا پر پاکستان فشار راوړي څو همکارۍ ته تیار شي.
مایکل روبین، چې د «امریکن انټرپرایز انستیتیوت» څېړونکی دی، په یوه لیکنه کې ویلي چې د افغانستان د ثبات او د دې هیواد له خاورې څخه د تروریستي ډلو د کار اخیستو د مخنیوي لپاره د پاکستان سیاسي موافقې او ښه نیت ته اړتیا ده.
روبین په دې لیکنه کې، چې په نشنل انترست خپرونه کې خپره شوې، لیکي«د افغانستان د سولې لپاره د امریکا د ځانګړي استازي تر ټولو ستره ستراتیژیکه ستونزه دا ده چې پر دې حقیقت یې ځان ناګاره کړی چې تر څو پاکستان د سختدریځو ډلو له ملاتړه لاس وانخلي، په افغانستان کې سوله ناشونې ده.»
د روبین په باور د خلیلزاد د ستراتیژۍ ورک ټکی دا دی چې څرنګه پاکستان ته قناعت ورکړل شي.
روبین پر پاکستان د فشار د وسیلو یادونه کړې او لیکلي یې دي«له تروریستي ډلو سره د پراخو اړیکو لرلو په خاطر د پیسو سپینولو د ځانګړې ډلې (FATF) په تور لیست کې د پاکستان د نوم شاملول، له ناټو دباندې د امریکا د ستر متحد په توګه د پاکستان پر نوم د چلیپا کرښه راایستل، د پیسو له نړیوال صندوق څخه د مالي مرستو او له نړیوال بانک څخه د پور اخیستو لپاره له پاکستان سره د امریکا د ملاتړ پای ته رسول او د پاکستان په خاوره کې د افغانستان د وسله والو مخالفانو تعقیبول هغه حربې دي چې اسلام اباد تر فشار لاندې راوستلی شي.»
خلیلزاد د افغانستان په سوله کې د ګاونډیو لا زیات رول غواړي
په همدې حال کې زلمي خلیلزاد ویلي، امریکا د افغانستان په سوله کې د پاکستان او نورو ګاونډیو هیوادونو د لا اغېزمن رول غوښتونکې ده.
د ډان نیوز د راپور له مخې، خلیلزاد وايي، د افغانستان سوله د امریکا د اوسني حکومت لپاره ډېره مهمه ده او که په دې هیواد کې سوله راشي جنوبي اسیا به د نړۍ پر یوه ستر اقتصادي پوټنسیل بدله شي.
د افغانستان د سولې لپاره د امریکا ځانګړی استازی د تېرې اوونۍ د یکشنبې په ورځ په اسلام اباد کې و.
خلیلزاد د پاکستان له چارواکو سره خبرې وکړې خو تراوسه پورې له طالبانو سره د اووم پړاو خبرو د پیلولو لپاره قطر ته نه دی تللی.
ده ټینګار کړی چې په افغانستان کې سوله باید د بین الافغاني خبرو له لارې ترلاسه شي خو نور هیوادونه په دې برخه کې مهم رول لوبولی شي.
د امریکا د بهرنیو چارو وزارت سرچینې وايي چې خلیلزاد به ژر سیمې ته لاړ شي او د افغانستان د سولې په اړه به خبرې پیل کړي.
څرګنده نه ده چې اوس خلیلزاد چیري دی.
خلیلزاد په داسې حال کې د بین الافغاني خبرو هیله کوي چې طالبان فکر کوي چې امریکا د ماتې په حال کې ده او په هر صورت له افغانستانه وځي.
خو د لوېدیځو رسنیو او شناندو له تبصرو داسې نه ښکاري چې امریکا دې لږترلږه په لنډ وخت کې له افغانستانه د وتلو په فکر کې وي.
The major obstacle is the northern alliance and warlords, because they believe when piece gets established in the country they will be questioned for how they have millions of dollars???
خلیلزاد وخت تیروی دته پاکستان ښه معلوم دی چی تر څو فشار پری رانه وړل شی د منافقت لاس نه اخلی