د تذکرو د ازمايښتي دورې پيل، د ولسمشر غني د پام وړ

امن  شینواری –

۱۵/ ۵ / ۱۳۹۴

   د روانې میاشتې پر ۲۸مه نېټه د برېښنايي تذکرو د وېش ازمايښتي دوره پیلیږي.د وزیرانو شورا د تصویب شوې مسودې پر بنسټ به د تذکرو ازمايښتي دوره په کابل ښار کې د ۹۰ ورځو لپاره وغځیږي. وروسته تر ازمايښتي دورې به کابل ښاریانو ته د تذکرو دوېش لړۍ شروع شي. دا مهمه پریکړه په داسې وخت کې کیږي چې ولسمشر غني د پښې درملنې لپاره المان ته تللی.

ویل کیږي د تصویب شوې مسودې له مخې به په تذکرو کې نه د افغان کلمه وي نه به قومیت لیکل کیږي. که څه هم لا دقیقه معلومه نه ده چې د افغان کلمه به وي که نه، خو د اندېښنې وړ خبره ده. که خدای مه کړه په تذکره کې د افغان کلمه و نه لیکل شي د خلکو حساسیتونه به راوپاریږي او پایلې به یې ښې نه وي.

دا هم ویل کیږي چې په یادې شوې مصوبه کې د تذکرو پر حقوقي اړخ بحث نه دی شوی او هغه یې د ولسمشر تر راتلو ځنډولی دی، د ولسمشر په نشتوالي کې دا بیړنۍ پرېکړه شاید یوازې د دې لپاره وي چې ازمايښتي دوره دستي پيل شي تر څو مرستندویه هېوادونه خپلې مرستې بندې نه کړي، ځکه چې د مرستندویه هېوادونه له خوا د تذکرو ادارې ته دوه اونۍ وخت ورکول شوی وچې که چېرته په دوو اونیو کې د تذکرو د وېش خبره معلومه نه کړي دوی به خپلې مرستې ودروي.

اوس مهمه خبره دا ده چې که په اوسنۍ مصوبه کې د افغان کلمه نه هم  وي او تر ولسمشره دا بحث ځنډیدلی هم نه وي، بیا هم  هغه پوره صلاحیت لري چې د یو تقنني فرمان پر اساس د افغان کلمه ورزیات کړي، که څوک وايي چې قوم دې ولیکل شي هم ورته و دې لیکي خو بې افغانه تذکرې به ګڼې ستونزې را ولاړې کړي. د تذکرې په مخ یوازې د افغان کلمې په لیکلو کې د ټولو قومونو خیر دی، هم د ملي وحدت ټینګښت کې رول لرلای شي او هم ورسره ګڼې نورې ستونزې ختمیږي، خو که بیا هم څوک تینګار کوي ورته دې قوم هم ولیکل شي، خو د افغان کلمې د نه لیکلو خبره اصلآ باید مطرح هم نه شي، دا لا کوم منطق دی چې په اساسي قانون کې مې دا خبره منلي وي چې د افغان کلمه د دې خاورې په هر فرد اطلاق کیږي خو په تذکره کې به یې نه منم. د نورو قومونو اکثره عام وګړي هم په تذکره کې د افغان کلمې پر لیکلو تاکید کوي خو محدود یو څو سیاسیون چې له بله ځایه خړوبیږي د دې خبرې مخالفت کوي.

موږ د ولسمشر پر پوهه او تفکر پوره باور لرو چې دې مسلې ته به یې پوره پام وي او داسې پریکړه به خدای مه کړه نه کوي چې د ګڼو خلکو حساسیتونه راوپاروي، خو بیا هم تاکیدآ یادونه کوم چې:

ښاغلی ولسمشر!

د دې خاورې وګړو د کلونو په اوږدو کې د دوو مهمو ارزښتونو لپاره بې شمېره  قربانۍ ورکړي دي، چې یوه یې د دین او مذهب خبره ده او بله د افغانیت. دا چې په دې ارزښتونو افغان وګړي په حقه که په ناحقه جنګیدلي هغه جدا بحث دی خو د دې ارزښتونو په سر یې د وخت حکومتونو ته بې شمیره ستونزې او سرخوږي جوړ کړي دي. دوی په دې دوو ارزښتونو کې د هیڅ ډول مصحلت زغم نه لري. دا چې سبا ناوخته نه وي نو افغانیت ته مو پوره پاملرنه غواړم!!

په پای کې تاسې ته د عاجلې روغتیا هیله کوم، روغه سټه مو نصیب شه، پخیر خپل وطن ته راشئ.