د جنرال دوستم یو زوی د شبرغان د فرقې قوماندان وټاکل شو

تاند- د عبدالرشید دوستم زوی یار محمد دوستم په شبرغان کې د ښاري ګارنیزیون قوماندان وټاکل شو.

د شنبې په ورځ شبرغان د ګارنیزیون د قوماندان په توګه د یارمحمد د معرفۍ په مراسمو کې د جوزجان والي لطف الله عزیزي د ولسمشر لومړی مرستیال جنرال عبدالرشید دوستم په دې وستایه چې د ده په وینا د بې دفاع خلکو ملګری دی او خپل زوی یې په شبرغان ښار کې د نظم د لا ټینګښت او دفاع لپاره ورلېږلی دی.

ده همداراز وویل چې یارمحمد پوځي زده کړې کړي او په دفاع وزارت کې یې د یوه فعال صاحب منصب په توګه دنده اجرا کړې ده.

د ښاغلي دوستم زوی په داسې حال کې د شبرغان د ګارنیزیون  قوماندان شو چې د جنبش ګوند یوه مشر نن /یکشنبه/ وویل چې د جنرال دوستم د چوکۍ د بېرته ورسپارلو پر سر له ارګ سره خبرې پیل شوي او پرمختګ پکې شوی دی.

په مشرانو جرګه کې د سرپل ولایت استازی عظیم قویاش ادوویل چې له ارګ سره په دې خبرې روانې دي چې دوستم ته د ولسمشر د لومړي مرستیال واک بېرته ورکړای شي.

قویاش وايي چې تراوسه پورې د خبرو له نتیجو راضي دی.

ده ونه ویل چې د دوستم د واک د بېرته ادعاده کېدو په اړه د دوی له لوري څوک له ارګ سره خبرې کوي.

ارګ هم تراوسه پورې په دې اړه څه نه دي ویلي.

جنرال دوستم له څو میاشتو راهیسې په ترکیه کې جلا وطن دی. نوموړی د ځان خلاف د هغې حقوقي دعوې د فسخه کېدو غوښتونکی دی چې د جوزجان پخواني والي احمد ایشچي پر ده کړې ده.

د افغانستان ولسمشر ویلي چې په قضايی چارو کې لاسوهنه نه کوي او دا مسله په محکمې پورې اړه لري.