تاند- د افغانستان ولسمشر محمد اشرف غني پرون /سې شنبه/ په ارګ کې د روسیې د ملي امنیت له سلاکار نیکولای پتروشیف سره وکتل.
ارګ نن وویل چې دواړو خواوو پر دوه اړخیزو اړیکو او د تروریزم پر ضد پر جګړه خبرې وکړې.
دا خبرې وروسته له دې کېږي چې په وروستیو ورځو کې د افغانستان ولسمشر په پکتیا کې بې له دې چې د روسیې نوم واخلي وویل، هغه هیواد چې تر یو ملیون ډېر افغانان یې وژلي، فکر کوي چې د یوې تروریستي ډلې په ملاتړ به د بلې مخه ونیسي، تېروتنه کوي.
روسیې د ولسمشر غني پر څرګندونو غبرګون وښود، ویې ویل چې داسې اسناد څوک نه شي وړاندې کولی چې ثابته کړي روسیه د طالبانو ملاتړ کوي.
« دواړو لورو د افغانستان او روسیې د دوه اړخیزه مناسباتو د لا پیاوړتیا، د تروریزم تهدید او پر وړاندې یې د مبارزې، سیمه ییزه همکاریو، اقتصادي، ترانزیتي او نورو مسایلو په اړه بحث او خبرې وکړې.»
د ارګ په خبرپاڼه کې ویل شوي چې د روسیې د ملي امنیت سلاکار د وروستیو پېښو په خاطر د افغانستان له حکومت او ولس سره غمرازي وکړه، ویې ویل چې افغانستان ته د سفر موخه یې د افغانستان مقاماتو او بېلابېلو ادارو سره د روسیې د اړیکو د پراختیا په اړه بحث او خبرې دي.
د روسیې د ملي امنیت سلاکار وویل، روسیه د باثباته افغانستان غوښتونکې ده او همدارنګه موږ چمتو یوو چې له تروریزم سره د مبارزې په برخه کې له افغانستان سره هر ډول همکاري وکړو. هغه زیاته کړه، موږ له افغانستان سره د ښو مناسباتو، اړیکو او اقتصادي همکاریو د لا ودې غوښتونکي یوو چې د سولې او ثبات د تامین لپاره ګټور وي.
ولسمشر غني وویل، باثباته او پرمختللی افغانستان د سیمې د هېوادونو په ګټه دی او موږ غواړو چې په سیمه کې د اقتصادي همکاریو، سوداګرۍ د ودې او نورو برخو کې رامنځته شوې اجماع لا پیاوړې شي.
ولسمشر غني وویل، تروریزم نه یوازې د افغانستان، بلکې د سیمې او نړۍ لپاره یو منځمهاله تهدید دی، نو د دغې شومې پدیدې پر ضد د واحدې ستراتیژۍ له مخې له کوم تفکیک پرته ګډې جدي مبارزې ته اړتیا ده. هغه زیاته کړه، له تروریزم په ځانګړي ډول هغو ګروپونو سره د مبارزې په برخه کې چې افغانستان او سیمه تهدیدوي، د فدراتیفې روسیې تجربې او د معلوماتو شریکول ډېر ارزښتناک دي.
مشرانو !
هیخ کله اعتبار ورباندی مه کوی د لستوڼی مار دی مار
زمونږ ملي ګټې دا ایجاوي چې د خپلو باوري نړیوالو دوستانو په موجودیت ، همکاري او ملګرتیا ساتلو سره د نړۍ له نورو ځواکمنو هېوادونو سره ښې او دوستانه اړیکې ولرو، هغو ته پراختیا ورکړو او دوي ته دا وخت ورنکړو چې د مغرضو او منافقو ګاونډیانو په خوله زمونږ دښمنانو سره یوځای او یا مرستې ورکړي او یا هم زمونږ له دښمنانو سره ملګري شي.