د نبیل او صالح ټاکنیز رقابت په رسنیزو ناندریو واوښت

 تاند، سه شنبه، د اسد ۱۵مه: د ولسمشرۍ نوماند رحمت الله نبیل، راتلونکو ټاکنو کې د اشرف غني لومړي مرستیال امرالله صالح ته پرانیستي لیک کې بلنه ورکړې که د وطن دوستۍ غږ دې رسا ساتل غواړې نو زموږ ټیم ته راشه، خو امرالله صالح ورته په وچ ځواب کې ویلي چې ماته اندېښنه مه کوه، له ولسمشر غني سره په کار کولو خوشاله یم.

د  افغانستان د ملي امنیت پخواني رئیس او د راتلونکو ولسمشرۍ ټاکنو نوماند رحمت الله نبیل اطلاعات روز ورځپاڼه کې خپل پرانیستي لیک کې امرالله صالح ته د هغه ټولې نیوکې وریادې کړې دي چې صالح په تېرو کلونو کې پر ولسمشر غني لرلې او بیا یې ورته ویلي که غواړې د وطندوستۍ غږ دې د تل لپاره خاموش نه شي، نو زموږ له انتخاباتي ټیم سره یو ځای شه.

په ځواب کې یې د افغانستان د ملي امنیت بل پخواني رئیس او د دولت ساز ټاکنیز ټیم لومړي مرستیال امرالله صالح پر خپل فیسبوک لیکلي: (( زه له ولسمشر غني سره په څلورو برخو کې ګډ کار کوم، تر څو افغانستان له اوسني وضعیت څخه وژغورو.))

صالح، نبیل ته په ځواب کې زیاته کړې، دوستان دې د ده راتلونکي ته اندېښنه نه کوي، بلکې پکار ده د نظام د ټینګښت او د افراطیت د ریښو د ایستلو لپاره په ګډه کار وشي: (( له موږ سره شئ چې دولتداري لا غوره او پیاوړې کړو.))

رحمت الله نبیل او امرالله صالح دواړه د افغانستان د ملي امنیت رئیسان تېر شوي او په وطندوستۍ کې خورا شهرت لري.

ویل کېږي کله چې حنیف اتمر د ولسمشر د ملي امنیت سلاکارۍ ته ځان ورساوه، نو د نبیل د خپلې خولې خبره ده چې دی له پاکستاني استخباراتي مشرانو سره د حنیف اتمر له ناستې پاڅول شو او بیا وروسته دا جنجال په دې تمام شو چې حنیف اتمر هڅه وکړه هغه د ولسمشر غني له پامه بد راولي او له دندې یې رخصت کړي.

دغه راز امرالله صالح هم کله چې د کندوز د پېښې د پلټنې راپور حکومت ته وسپاره نو د اتمر ډلې دغه راپور تر تخر ګ لاندې ونیو چې په دې سره یې تر یو وخته صالح له حکومته خواشینی کړی او د ولسمشر سلاکاري یې پرېښوده.

مګر بېرته چې ولسمشر غني له دې ټولو اختلافاتو سره سره پر صالح باور وکړ او د کورنیو چارو وزارت یې وسپاره، صالح بېرته د نظام د پیاوړتیا لپاره لاس په کار شو چې د خپلو سیاسي حریفانو لخوا سختو نیوکو سره مخ شو، مګر صالح ټولو ته په زغرده ځواب ورکړ چې د ولسمشر غني څنګ په هیڅ شان نه پرېږدي.