د ننګرهار والي له یو بل مرګوني بریده روغ وتلی

تاند، یکشنبه، د حمل ۲۴ مه: د ننګرهار والي شاه محمود میاخېل نن په خوږیاڼو ولسوالۍ کې له یو وسله وال برید څخه روغ وتلی دی.

د ننګرهار د والي ویاند عطاالله خوږیاڼی تاند ته وایي، د والي په مشرۍ د چارواکو یو پلاوی نن سهار د خوږیاڼو وزیرو په ابکو سیمه کې جوړ شوي پول د پرانیستې لپاره تلل و چې د راستنېدو پر مهال یې ډزې پرې کړېدي.

نوموړی وایي، دوی ته اطلاعات رسیدلي وو چې د وزیرو په بایي خیلو او دوه سړکې سیمه کې یو څو تخریبکاره شتون لري: ((زموږ د راتګ پر مهال یې څو ډزه وکړل چې له امله یې یو ملکي چې اصلا ښوونکی دی، هم ټپي شوی، خو وسله وال تښتېدلي دي.))

نوموړی وایي، ننګرهار والي او ټول همکاران یې اوس دفتر ته رارسېدلي دي او ټول روغ دي.

بلخوا د خوږياڼيو د روغتون مشر ډاکتر نوراغا هم وايي، چې د نښتې له ځاى څخهيو ملکي وګړى په ټپي حالت کې روغتون ته وروړل شوى دى.

د ننګرهار والي څو میاشتې وړاندې هم هغه ځوان وباښه چې د ده په وژلو پسې راغلی و خو له برید وړاندې ونیول شو.