د هلمند ستوری/ محمد اقبال خيبر

له نن څخه نږدې اته ويشت کاله وړاندې په کال ۱۳۶۵ لمريز ددې لوی وطن په اشغال سوې سيمې ځنګل پير اليزي پنډغالي کې عبدالستار دې دنيا ته دمحمد قاسم پر غولي وزيږيد له دولسم ټولګي څخه يې وروسته د دې وطن اړتيا ته په کتو پوهنتوني ژوند دکندهار پوهنتون دکرهنې په پوهنځي کې تير کړ او په کرهنې پوهنځۍ کې يې ځانګړی مسلک هارتيکچر وټاکه ستوری له آره دهلمند ولايت دبست دتاريخي سيمې د کاريز دی چې دم ګړی دهلمند ولايت په مختار کلي کې اوسي او د هلمند پوهنتون داستادۍ تر څنګ دهلمند مدني ټولنې مرستيال، دسي ايچ اې غير دولتي ادارې کارکوونکی او په بست راډيو کې وياند دی ستوری غټ ستوری دی يانې په قد لوړ اوپه تنه چارشانه دی، خبري يې ډير خوږې دي دپوهنتوني لغاتونو دلوستلو سره سره دکليوالي الفاظو کارونه يې بيل خوند لري سره له دې چې روانې خبرې يې کليوالي رنګ لري دشاعري دخوند ځای يې هم دکليوالي تورو په کارونه کې دی دا چې په قد لوړ دی تګ يې هم ځانته خوند لري او رښتيا بايد هيره مې نه سي دهلمند پوهنتون دکرنې پوهنځۍ محلصين بيا ځکه ورڅخه خوشاله دي چې لوست يې په ورين او خوشاله څهره دی له غم و غوسې سره وران دی ، ستوری شاعر هم دی ورسره په نثر ليکلو کې هم مهارت لري دوه کتابه يې چاپ ته چمتو دي يو يې شعري ټولګه ده او بل يې (د هلمند په جګړه کې د چا لاس دی) ځيړنيز اثر دی خو په ټوله کې که سړی ووايي يوه پاچاهي سړی دی.