د هلمند یو شمېر قومي مشرانو له والي وغوښتل چې د القاعده په تور نیول شوې ښځې پرېږدي

څومره به ښه وي چې د احساساتو پرځای له عقل او تحمل نه کارواخلو.
زمونږ مشرانو مونږ ته څومره ښه متلونه او پخې خبرې پرایښې دي . که مونږ پر هغو عمل وکړو ، له ډېرو لږو سهوو ، اشتباه او خطا ګانو سره به مخ شو ؛ مثلا:
وایی خپل عمل د لارې مل دی .
چې بد ګرځي ، بد به پرځي.
که شمال نه وي ، د ونې پاڼې نه ښوري.
خپل مال ساته او ګاونډی غل مه نیسه.
ترڅو چې رښتیا راځي ، درواغو به کلي وران کړي وي.
دا متلونه مې د هلمندیانو ورونو تر وروستیو غمیزو دلته نقل کړل.
ستاسو احساسات ډېر پاک او حق پر جانب یاست . مونږ پښتانه هېڅکله د ښځو سپکاوی نشو زغملی. ښځو ته ډېر درناوی لرو او څو مو په وس کې وي د ظالمانو منګولو ته یې نه پرېږدو.
اما نن زمانه بدله شوېده، زمونږ د خاورې ، دین او کلتور دښمنان له هرې وسیلې کار اخلي . دوي خپلواهدافو ته د رسېدو لپاره له سپین ږیرو ، ماشومانو او ښځو نه هم استفاده کوي. ځوانانو ته د ښځو کالي او چادري وراغوندي. ماشومان ځان مرګي ته هڅوي او د حورو د دیدار لپاره یې د بېګناه ولس وژلو ته رالېږي . پر ښځو جاسوسي کوي او پرځوانانو خپل ولس او قوم وژني .
بنا جرم چې څه ډول وي هغه جرم دی، خصوصا سنګین جرایم چې د یو ملت ټولو ګټو ته پکې تاوان رسیږي د بښلو نه وي.
په هلمند کې دولتي مقامات وایې چې په نیول شویو خلکو د جاسوسی تور دی . که داخبره رښتیا وي نو پرېږدئ چې تور او سپین مالوم شي. که بې ګناه ثابت شول ، برائت به واخلي او خپل کورته به راستانه شي. که مجرم ثابت شول خپله جزا به وویني.