د همپالنې او دولت ساز ټیمونو مشرانو یو پر بل لفظي ټکونه کړي

تاند، دوشنبه، د میزان ۸مه: که څه هم د ولسمشرۍ نوماند عبدالله عبدالله وايي، چې د مشهور دروغجن او درغلګر لخوا د ملت په برخلیک د لوبو وخت ختم شوی او دی به له خپل ټیم سره ډېر ژر نوی حکومت جوړ کړي، خو د دولت ساز ټاکنیزې ډلې لومړی مرستیال امرالله صالح یې بیا په غبرګون وايي، د کوڅه يي ادبیاتو د کارولو وخت تللی او خلک قانون ته درناوی غواړي.

ښاغلي عبدالله نن ماسپښین درې بجې په یو خبري کنفرانس کې اشرف غني ته په اشاره دا خبرې وکړې او زیاته یې کړه د ملي یووالي حکومت یې د ملي مصلحتونو په اساس ومانه، خو له دې څو ساعته وروسته ښاغلي صالح په یو خبري کنفرانس کې وویل، د بریالی نوماند د اعلان حق یوازې د ټاکنو له خپلواک کمېسیون سره دی.

نوموړي وویل، که څوک پر ده نیوکه کوي چې ولې یې امریکا غږ ته خپل ټیم بریالی ښودلی، نو د ده په وینا هغه یې یو حدس وهلی دی نه دا چې اعلان یې کړی وي.

هغه له نورو نوماندانو غوښتنه وکړه چې د خلکو ارادې او قانون ته درناوی وکړي، نه دا چې کوڅه يي ادبیات وکاروي: (( د خلکو ذهنیتونه مه خرابوئ، موږ له کوڅه يي او د سړک د سر له قضاوتونو څخه د قانوني قضاوتونو پر لور تلل غواړو.))

 د ثبات او همپالنې او دولت ساز په نوم ټیمونه چې سږ کال بیا تر رسمي پایلو وړاندې یو تر بله د بریا ادعاوې کوي او د درغلۍ تورونه لګوي په اړه یې ولس وايي، اندېښمن دي چې د دغو لوریو د ټکر له کبله یو وار بیا د بحران او کورني جنجال شرایط برابر نه شي.