د هند سفير په کندهار کي د کرکټ لوبغالي د بنسټ ډبره کښېښوده

خبرپاڼه

نېټه: ١٣٩۴-۱۲-۱۰

کندهار، افغانستان- د هندوستان سفير په کندهار کي د يو لړ مراسمو پر مهال د کرکټ لوبغالی چي د دغه هيواد له خوا جوړيږي، د بنسټ ډبره کښېښوده.

نن سهار له کابل څخه د هندوستان سفير منپريت وهرا، د اقتصاد وزير عبدالستار مراد، د کانونو او صنايع وزير داودشاه سبا، د ښار جوړوني وزير سيد سعادت منصور نادري، د بهرنيو چارو وزارت سياسي معين حکمت خليل کرزي، د کرکټ بورډ مشر نسيم دانش کندهار ته سفر وکړ او دغلته يې په يوه پراخه غونډه کي چي د کرکټ لوبغالي د بنسټ د ډبري ايښودلو په موخه جوړه سوې وه، ګډون وکړ.

د کندهار والي ډاکټر همايون عزيزي د دغه ولايت ټولو اوسېدونکو ته د کرکټ لوبغالي د جوړېدو مبارکي وويله او د هندوستان له تلپاتو مرستو څخه يې ستاينه وکړه. ښاغلي عزيزي وويل کرکټ يوه له هغو لوبو څخه ده چي د افغانستان نوم يې په جهان کي ځلولی دی. افغانانو د کرکټ په برخه کي په ډېر لنډ وخت کي دومره مزل وهلی چي ډېر سابقه لرونکي هيوادونه هم نه دي توانېدلي چي دغومره لاسته راوړني ولري.

نوموړي زياته کړه چي د کرکټ په ډګر کي د هندوستان مرسته او تشويق افغانانو ته دا الهام ورکوي چي نه يوازي خپلي لاسته راوړني وساتي، بلکي لا هم مخته ولاړ سي. د کندهار والي وويل: موږ د هر هغه حرکت چي سپورټ تقويه کوي، ستاينه کوو او هر ډول لازمي همکارۍ ته اماده يو. زه د کندهار د ولسونو په نمايندګۍ له ټولو هغو هيوادونو په خاص ډول د هندوستان له همېشنيو همکاريو څخه چي له کندهار سره يې په تعليمي، تجارتي، روغتيايي او سپورټي برخو کي کوي، مننه کوم او د دوست هيواد هندوستان دا اقدام چي په کندهار کي د کرکټ لپاره يو مجهز او معياري لوبغالی جوړوي، ستايم او د کندهار ولس به د دوی دا مرسته هيڅکله هېره نه کړي.

د هندوستان سفير منپريت وهرا خوښي وښوده چي په کندهار کي د کرکټ لپاره مجهز لوبغالی جوړوي او ويې ويل چي د دغه لوبغالي اړوند د کرکټ په اکاډمۍ کي به د کندهار ځوانانو ته روزنه ورکول کيږي. نوموړي زياته کړه چي له دغه ځايه به ځوانان د افغانستان ملي لوبډلي ته لار پيدا کوي او د دې لوبغالي مستقيمي لوبي په ټلوېزيونونو کي خپريږي.

نوموړي هيله وښوده چي افغان ځوانان د هندوستان په ملي لوبو کي ولوبيږي او د ورزش په برخه کي يې د افغانانو لاسته راوړني وستايلې. ښاغلي وهرا ژمنه وکړه چي نورو دا ډول مرستو ته به هم دوام ورکوي. هغه د وينا پر مهال د افغانستان او هندوستان پر دوستانه اړيکو خبري وکړې او هندوستان يې د افغانستان تلپاتی دوست هيواد وباله.

د افغانستان د کرکټ بورډ عمومي رئيس نسيم دانش د هندوستان له مرستي څخه مننه وکړه او ويې ويل چي دا کرکټ لوبغالی د هندوستان له خوا د يو ميليون ډالرو په ارزښت جوړيږي. هغه زياته کړه چي دغه مجهز لوبغالی پر ۴۰ جريبه مځکه جوړيږي چي د کرکټ اکاډمي به هم ولري او ځوانان به پکي روزل کيږي. دانش وويل چي د دې کرکټ لوبغالي د جوړېدو چاري به په اکتوبر مياشت کي بشپړي سي.

د غونډي په پای د کندهار د ولايتي ادارې له خوا د هند سفير ته يو مننليک ورکول سو.