د ۲۰۱۵ کال نړیوال جام او زموږ لوبډله/ محمد عمر آرین

۱- د آسټرلیا، نوي زیلانډ، انګلستان، آیرلنډ او سکاټلنډ  ویشتځایونه یو شان دي، په ویشتن ځای شنه جلګه وي.
۲- ویشتنځای یې ډېر کلک وي چې ټیز ټوپ آچونکو لپاره ډېره مرسته کوي
۳- سوکه توپ اچونکو سره دومره خاصه مرسته نه کوي.
تبصره: په دې اساس پورته یادې لوبډلې ښې پرې لوبېږي ځکه چې د هغوی ټول کورني تمرینات په هماغه شان ویشتنځایونو کې وي. د افغانستان ټیم کې ۴ تیز توپ اچونکي دي شاهپور، حمید او دولت چې دوی توپ ته سوینګ ورکولای شي خو آفتاب عالم نه یوازې چې سوینګ نشي کولای د توپ اچونې سرعت یې هم له ۱۳۲KPH څخه نه زیاتېږي، نو پر دې اساس د هغه ګومارنه په ټیم کې کاملا بې ځایه کار دی.

افسر ځاځی په تیرو ۲ کلونو کې هیڅ داسې کومه خاصه کارکردګي نده ښودلې چې د هغه پر مټ دې په نړیوال جام کې ولوبېدای شي خو کرکټ بورډ یوازې د دې لپاره چې هغه اسټرلیا لیدلې نو هغه يې په ټیم کې نیولی. د جاوید احمدي حال هم همداسې دی، په ټیم کې د ځای پیدا کولو لپاره هیڅ منطقي دلیل نلري.

میرویس اشرف چې سن یې هم له ۴۰ زیات دی په ټیم کې یې شتون کاملا غیر منطقی او بې معنا دی او په ټول ژوند کې یې یوازې یوه (۵۰ یزه) لري، چې د هغه د وړتیا ښکارندوی نده او باید له ټیمه لرې کړای شي.

وړاندیز:

۱-د دې لپاره چې په ټیم کې ۳ تیز ټوب اچونکی لرو نو آفتاب عالم ته اړتیا نشته نو د هغه پر ځای باید شفیق الله شفق ټیم ته راوستل شي، چې د تیزې لوبې وړتیا لري او په پایلني اورونو کې ټیم ته ښې منډې لاسته راوړای شي.
۲- افسر ځاځی دې کینول شي او پر ځای د محمد شهزاد محمدي راوستل شي ځکه هغه له سوکه توپ اچونکو سره ستونزه لري او سوکه توپ اچونکي په آسترلیا کې نه چلېږي نو شهزاد ښه انتخاب دی.
۳- د جاوید احمدي پر ځای نور علی ځدراڼ باید راوستل شي ځکه هغه یوازینی ټوپ وهونکی دی چې کرکټ په هوش سره لوبوي او ښه ټایمینګ هم لري.
۴- د میرویس اشرف پر ځای باید حشمت الله شاهدي ټیم ته راوستل شي، ځکه هغه په سړه سینه لوبه کوي او که چېرې ټیم په ستونزه کې وي هغه دا وړتیا لري چې تر فشار لاندې لوبه وکړي، او ټیم ولوبوي.

په درنښت