اروا پوهنه کې وایي:کله چې یو شی په ټولنه کې زیات تکراریږي، هغه شی ورځ تر بلې زیاتیږي.دا بېلګه ورته ښه بولم:په هند کې یو کال مخکې په یوې انجلۍ جنسي تېرۍ وشو،دا خبره رسنیو تر دې حده و غځوله،چې له هند نه یې افغانستان ته هم پښې را وغځولې.په هندي ټولنه کې دغه ډول کړنو نور هم زور واخسته او تر دې دمه یې د جنسي تېري مخه ډب نه کړه.همداسې زمونږ په رسنیو کې د ښځو پر وړاندې د تاو تریخوالي خبرونه هره ورځ اورو؛خو دښځو پروړاندې د تاوتریخوالي کچه راټيټه نه ،بلکې نور هم زیاته شوه.غلت یې څه شی دي؟غلت یې دا دی، چې رسنیو یواځې د خلکو او د ژوند په منفي ټکو پسې راخستې،خلکو ته یې ژوند نه ور ښودلی او خپل مسوولیت یې سم نه دی درک کړی.
زمونږ ټولې تلویزوني رسنۍ همداسې دي، د جنګ او جګړو نه یې بله خبره نشته.لامل هم همدا دی، چې په هیواد کې جنګ ورځ تر بلې زیاتېږي او دسولې مراندې ورځ په ورځ سستېږي،نو دلته د ارواپوهنې خبره اړخ لګوي.
خو دغه دود تېر ماښام شپږ بجې یوې رسنۍ مات کړ،البته له دې مخکې اشنا تلوېزیون دغه دود مات کړی و؛ خو که اشنا تلوېزیون په هیواد کې د ننه وی، نو کېدای شي هغه به هم د دغو رسنیو پر لاره قدم اېښوده.
تېر ماښام اریانا تلوېزیون د خبر په برخه کې یو نوی ګام کېښوده ،چې نورې رسنۍ ترې بې برخې دي.دوی خلکو ته د جنګ او جګړو تر څنګ د ژوند تېرولو نورې لارې چارې هم ورښودې،خو په دې ګام کې لویه ونډه د ازادۍ راډیو بولم،ګنې اریانا تلوېزنون به هم د نورو رسنیو غوندې په پټو سترګو روان و.
په دې خبرونو کې یې د نورو ټولنو ژوند زمونږ ټولنې سره پرتله کړی و.لومړی خبر یې د کوزې پښتونخوا پر سړې هوا او د ګاز پر کمښت و.په دې خبر کې یې دا را ښوده، چې نورې ټولنې هم زمونږ په څېر بېوزله دي،خو د صبر له مخې غني دي،بې لارۍ ته مخه نه کوي ،لارې نه لوټي،جنګ نه کوي او خپله شپه سبا کوي.
دویم خبر یې بیا هم له همدې سیمې و،په دې خبر کې یوه انجلۍ د نړۍ پر لویه پرخه ـ چې مونټ ایورسټ ورته وایي ـ د ختو سیالۍ ته ورتله.په دې خبر کې بیا هم زمونږ ټولنه له هغې ټولنې سره پرتله کړې وه،چې نړۍ کوم لور ته خوځښت کوي او مونږ پر کومه لاره روان یو،د نړۍ د نورو خلکو فکرونه کوم لور ته اوختي او زمونږ فکرونه پر کومه لاره روان دي.
دې ته ورته د لوېدېځې او ختېځې نړۍ راپورونه پکې شامل وو او د هغوی ژوند یې زمونږ په څېر بېوزله وښوده ؛خو فکرونه یې له مونږ نه څو چنده مخکې وو.
د ازادۍ راډیو دغه چمتو شوي خبرونه عصمت څاروان پر مخ وړل،ده په دومره خواږه انداز ویل، چې دټولنې ډېر منفي ذهنونه یې مثب لور ته را کاږل.
د ذهن خبره مې ځکه وکړه،چې پلار مې په کورنۍ کې بېسواد دی؛خو فکر یې په ټوله نړۍ هم نه ورکوم.ماته یې مخ راواړه او راته یې وویل: نن د خبرونو په خوند په پوی شوم او بیا یې را ته وویل: چې ژوند له دوو اړخونو جوړ دی، چې هم یې خندولی شې او هم یې ژړولی شې،خو کامیاب هغه دی چې هم یې وخندوي او یې وژړوي،په دې خبرونو کې دغه دواړه اړخه له ورایه ښکارېدل.ما مې د پلار په خبرو فکر وکړ،چې یو بېسواده سړی سره دا فکر شته،چې خلکو ته ژوند ور زده کړي،خو زمونږ لوی ژورنالستان او رسنۍ د فیل په غوږ کې اوده دي.
په راتلونکي کې مې له ټولو رسنیو هیله ده،چې خپل مسولیت ته متوجه شي او په خپلو خپرونو ، په تېره د خبر برخې ته پام وکړي او خلک دې یو مثب لور ته متوجه کړي.د اشنا تلوېزیون،آزادۍ راډیو،بي بي سي راډیو غوندې دې په وړو وړو څېزونو راپورونه دي جوړ کړي او د هغوی په ارزښت دې خلک پوی کړي،که یو خبر د مرګ ژوبلې وي نو دوه خبرونه دې د ژوند په ارزښتناکو څېزونو ولیکي، چې د خلکو ذهنیت د جنګ نه،ژوند ته راوګرځي.
مصطفی باور
.باور صیب ! لیکنه موښکلې او هر اړخېزه وه بریالی اوسې