روسیه: غرب په افغانستان کې ناکام دی، موږ د حامد کرزي پلوي یوو

تاند، پنجشنبه، د میزان ۱۱مه: د روسیې د بهرنیو چارو وزیر سرګي لاوروف وايي، په تېرو دوه لسیزو کې سره له دې چې د افغانستان پر بحران پراخ امکانات مصرف شول، لا هم د دغه هیواد ستونزه پر خپل ځای ده.

نوموړي د ولادي په نوم یوه نړیواله مناظره کې ویلي، لویدیځ په افغانستان کې له شل کلنو هڅو او حضور سره سره ناکام شو او د افغانستان پخوانی ولسمشر حامد کرزی په دې خبره ډېر ښه پوه دی.

ښاغلي لاوروف ویلي، د افغان بحران د حل په تړاو د کرزي د مؤقف ملاتړ کوي: (( ښاغلي کرزي له ټاکنو څو ورځې وړاندې وویل، چې ټاکنې وځنډوئ لومړی سوله وکړئ، خو دا په داسې حال کې وه چې افغان حکومت دسولې هڅې له یوې مخې درولې وې.))

ښاغلي لاوروف پر امریکا تور ولګاوه چې ترهګري یې پیدا کړې ده او کله چې روسیې په افغانستان کې حضور درلود نو واشنګټن به د مجاهدینو مالي او تجهیزاتي ملاتړ کاوه چې دا کار بالاخره د القاعدې په راپورته کېدو تمام شو.

ښاغلي سرګي لاوروف زیاته کړې د چې د امریکا دا ادعا چې ګواکې ترهګر به کنټرول کړي اوس ناسمه ثابته شوې ده.

روسیه په افغان بحران کې امریکا په داسې حال کې ناکامه، د مجاهدینو پلوې او ځان د حامد کرزي د مؤقف پلوي بولي چې په دې وروستیو کې یې د امریکا پر ضد د طالبانوملاتړ، د حکومت پر ضد د مجاهدینو مشرانو او حامد کرزي ښکاره ملاتړ پیل کړی دی.

روسیه په دې وروستیو کې حامد کرزی په افغانستان کې تر ټولو مهم سیاسی متحد ګڼي.