شهباز شریف:  ناممکنه ده چې هم کشمیر کې بوخت شو، هم لویدیځ سره افغانستان کې مرسته وکړو

تاند، چهار شنبه، د اسد ۲۳مه: د پاکستان د اوسني حکومت پر ضد د پارلماني اپوزیسیون مشر شهباز شریف یو وار بیا د کشمیر لانجې ته له افغان بحران سره تړاو ورکړی او ویلي یې دي که پاکستان په کشمیر کې بوخت وي، لویدیځ سره له افغانستان څخه په وتلو کې مرسته نه شي کولی.

نوموړي د پاکستان پارلمان ته په وینا کې ویلي، که پاکستان په کشمیر کې بوخت ساتل کېږي نودا به ډېره سخته وي چې له لویدیځو هېوادونو سره په افغان کشاله کې هم مرسته وکړي.

نوموړي تر دې وړاندې ویلي وو، دا امکان نه لري چې په افغانستان کې دې د سولې جشنونه نیول کېږي او کشمیر دې په لمبو کې سوځي: (( زموږ حکومتونو د کشمیر مسئله په افغان کشالې پورې تړلې ساتلې وه، خو عمران خان افغانستان لویدیځ او کشمیر هند ته سپارلی دی.))

د شهباز شریف په دې وینا طالبان مجبور شول چې یوه اعلامیه ورکړي او پاکستان و هند ته پیغام ورکړي څو دا لانجه په افغان کشالې پورې ونه تړي.

خو د تاند د سرچینو په حواله پاکستان د کشمیر موضوع په افغان سولې پورې تړلې او د سولې اتم پړاو مذاکرات هم چې ټاکل شوې وه د سولې تړون په کې لاسلیک شي، د پاکستان لخوا ځنډول شوي دي.