عطا نور: د حکومت په ضد به طالبانو سره یو ځای شم

تاند، پنجنشنبه ، د اسد دریمه: د بلخ له امپراتورۍ څخه شړل شوی عطا محمد نور وايي، که اړتیا شوه د اوسني حکومت پر ضد به طالبانو سره ودرېږي.

نوموړي له یوې خصوصي رسنۍ طلوع نیوز سره تازه مرکه کې دا خبره کړې او زیاته کړې یې ده په هیڅ صورت به ورته د منلو وړ نه وي چې د ده په وینا اوسنی مستبد او دیکتاتور حکومت راتلونکو ټاکنو کې یو وار بیا د درغلیو په زور واک ته ورسېږي.

نور ویلي، که اړتیا شوه د دې کار د مخې نیولو لپاره به حتی طالبانو سره هم ودرېږي: (( که تقلب وشو، نو که په جنګ وي، که په بحران وي که په هر څه وي موږ به د ټاکنو پایلې ونه منو ان تر دې چې طالبانو سره هم یوځای کېږم))

نوموړی چې پاکستان ته هم دې ورځو کې نږدې شوی وایي، د دغه هېواد رول د سولې پروسه کې ډیر مهم دی: (( زه خپله د پاکستان ضد وم، خو اوس باید له پاکستان سره د ګټو په اساس د خبرو له لارې خپل مسایل حل کړو.))

عطا محمد نور یو له هغو کسانو څخه و چې په دې وروستیو کې پاکستان د خپلې بادارۍ په نوم اسلام اباد ته ورغوښتي وو او د سولې نمایشي غونډه کې یې کېنولي وو.