عمران خان: د پاکستان ملکي حکومت او پوځ د افغان سولې په اړه یوه خوله شوي دي

تاند، دوشنبه، د دلوې ۲۸: د پاکستان لومړي وزیر عمران خان په دغه هیواد کې د افغان کډوالو د ۴۰ کلونو په پوره کېدو وربللي نړیوال کنفرانس ته په وینا کې ویلي، اسلام اباد په افغانستان کې د سولې غوښتونکی دی ځکه چې په جګړه ځپلي هیواد کې بې ثباتي د دوی په ګټه نده.

عمران خان په دوحه کې د متحده ایالاتو او طالبانو تر منځ روانو خبرو ته په اشاره وویل، د افغانستان خلکو د بلې هرې انساني ټولنې په پرتله ډیر زیان لیدلی دی او دی د زړه له تله د سولې خبرو د بریالیتوب دعا ورته کوي.
نوموړي ویلي، اوسمهال د پاکستان ملکي حکومت او پوځ دواړه د افغان سولې په اړه یوه خوله دي: (( پخوا ویل کیدل چې د پوځ او حکومت د نظرونو اختلاف موجود دی، خو اوس موږ په یوه خوله یوو او افغانستان کې سوله غواړو.))

عمران خان وایي، هیواد یې د دې لپاره افغانستان کې سوله نه غواړي چې د ۱ میلیون او ۴۰۰ زره مهاجرو کړربه توب ور په غاړه دی، بلکې په وینا یې افغانان نور د سولې حق لري.

عمران خان وویل، پاکستان کې د ترهګرو ځالې نشته خو شاید چې د سپتمبر له ۱۱ مې وروسته د افغان کډوالو په کمپونو کې ځینې کړۍ فعالې وي: (( موږ لپاره ډیره سخته ده چې په افغان کمپونو کې د وسله والو پر ضد پلټنې وکړو، ځکه هلته سلګونه زذه افغانان ژوند کوي.))

لومړي وزیر عمران همدا راز وویل چې پاکستان د بشردوستانه دلایلو له مخې او ډیورنډ کرښې ته نږدې سیمو کې د سوکالۍ راوستلو لپاره په افغانستان کې سوله غواړي.

هغه د کنفرانس ګډونوالو ته ډاډ ورکړ چې واک ته له رسیدو راهیسې یې حکومت د افغانستان د سولې د پروسې د اسانتیا لپاره هرڅه کړي دي.

تر عمران خان وړاندې د ملګرو ملتونو سرمنشي انټونیو ګوتریش هم په اسلام اباد کې له افغان کډوالو د پاکستان د  څلوېښت کلن کوربتوب په مناسبت جوړې شوې ناستې ته وویل، د سیمه ییزې اجماع د جوړولو په برخه کې د پاکستان رول ټاکونکی او اړین و.

مګر افغان ولسمشر د مونیخ په څنډه کې د پاکستان په نیت شک ښکاره کړی او ویلي یې دي چې پاکستان باید د ترهګرو ملاتړ بند کړي او په سیمه ییز امنیت یو ګډ تفاهم ورسره رامنځته شي.