غني: طالبانو مذاکراتو ته شرطونه مه ږدئ، ګني زموږ شرطونه هم شته

تاند، سه شنبه، د حوت ۱۳مه: ولسمشر محمد اشرف غني وايي چې طالبان دې له پاکستان سره اړیکې پرې کړي، دوی به ورسره د سولې خبرې پیل کړي.

ولسمشر دغه خبره په ننګرهار کې کړې او ویلي یې دي چې طالبان دې د زندانیانو د خوشې کولو له پاره شرطونه نه ږدي او که چېرې هغوی شرطونه ږدي، دوی یې هم لري.

ولسمشر ویلي: « کله چې مذاکراتو ته کېنئ، روغه کوئ، یو خوا هر شی نه غواړي، دا زموږ او ستاسې دود او دستور دی، که په بندیانو باندې غږېږي، دا دې شرط نه ږدي، موږ هم شرطونه لرو، ماته دې ووايي، څه وخت له پاکستانه وځي، رادې شي، سوله کوو.»

غني وویل، افغان وژنه جرم دی، طالبان دې افغانانو ته سپکاوی نه کوي، ځکه په وینا یې چې افغانان د خپلې بې وزلۍ ښکار شوي دي.

ښاغلي غني طالبانو ته په خطاب کې وویل، د سولې خبرې اترې به د جرګې له لارې وکړي، د پردې تر شا هېڅ خبرې نه کېږي، هر هیئت چې ځي، صلاحیتونه به یې محدود وي؛ خو په کابل او ولایتونو کې به قوي ملاتړ ولري: «سبا منطقه سوله غواړي که نه، له القاعدې ځان بېلوئ، مګر نورو نه یې نه بېلوئ. اصلي خبره داده چې له خارجیانو سره یې منئ چې سوله کوئ، نو د جهاد مانا څه شوه، افغان وژنه جرم دی، موږ چاته سپکاوی نه کوو، طالبان د دې وطن خلک دي، اما نورو افغانانو ته دې سپکاوی نه کوي، راشئ، چې په جرګې باندې نتیجې ته ورسېږو.»

ولسمشر محمد اشرف غني وویل، د هېواد په ګټو او د افغانانو په حقونو معامله نه کوي، په دې برخه کې هېڅ ډول انعطاف نه شي کولی او د نظام ساتنه به کوي.

ولسمشر د خپل پرمختیايي پلانونو په اړه د خبرو په دوام کې د ننګرهار په ګمبیري دښته کې د هوايي ډګر جوړېدلو تازه ژمنې تر څنګ ننګرهار او کونړ ته د وارداتي برېښنا لېږدول، په دغو دواړو ولایتونو کې د استنادي دېوالونو او بندونو جوړول او پر کانال پانګونه هغه څه یاد کړل، چې د نوي حکومت په لومړیتوبونو کې دي.

دا په داسې حال کې ده چې په قطر کې د طالبانو د سیاسي دفتر ویاند سهیل شاهین په یوه تازه ټویټ کې لیکلي دي چې دوحې ته د افغان حکومت ورغلي پلاوي سره يې لا هم نه دي لیدلي.

سهیل شاهین لیکلي دي، د بین الافغاني خبرو له پیل وړاندې به د دوی د بندیانو د چارو مسئولین د حکومت د محابسو له مسئولینو سره ګوري، څو تر مذاکراتو مخکې ۶ زره بندیان ازاد کړل شي.