غني: کرزی او عبدالله د سولې طرحه نه لري، فقط نیوکې کوي

تاند، پنجشنبه، د دلوې ۳مه: ولسمشر غني په سویس کې د داووس کنفرانس په څنډه کې ویلي، عبدالله عبدالله او حامد کرزی د سولې هیڅ طرحه نه لري.

ښاغلي غني ویلي، دغه دوه کسان له دې کبله هیڅ کار یې له لاسه نه کېږي، نو پر دوی نیوکه کوي.

نوموړی وايي، کرزی په خپل وخت کې له طالبانو سره یوه ورځ اوربند هم ونه کړای شو، مګر ده دا کار وکړ او درې ورځې اوربند یې رامنځته کړ: (( کرزي حتی طالبانو ته بې قیده او بې شرطه د مذاکرې بلنه ورکړه؟ نه دا کارما وکړ، ځکه چې زه برنامه لرم او کار پرې کوم، د عبدالله او حامد کرزي د سولې برنامه څه ده؟ یوه صفحه دې ماته راښکاره کړي چې دوی د سولې لپاره لیکلې وې.))

ښاغلي غني د داووس کنفرانس په څنډه کې ویلي، طالبان په ۲۰۰۱ کال خپلو کورونو ته ګرځېدلي وو، خو کرزي او ټیم یې داسې څه وکړل چې هغوی یې بیرته غرونو ته مجبور کړل: (( کرزی باید افغانانو ته په دې اړه ځواب ووايي.))

ولسمشر همدا راز ویلي، هیڅ کله به اجازه ور نه کړي چې د طالبانو او امریکا تر منځ یوه ناوړه هوکړه او معامله وشي.

نوموړی دا خبرې په داسې حال کې کوي چې حامد کرزي څو ورځې وړاندې له بي بي سي سره په مرکه کې وویل، د غني حکومت د اوربند په بهانه د سولې له خبرو څخه تېښته کوي.

همدا راز عبدالله عبدالله څو ورځې وړاندې په وزیرانو شورا کې ولسمشر غني ته په اشاره وویل، چې سوله د یو کس کار نه دی او نه یې یو کس د انحصارولو حق لري.