قانوني: که داخلي اجماع جوړه نه شي، سوله به په توطیه بدله شي

تاند، پنجشنبه، د دلوې ۲۴مه: د جمهوري ریاست پخوانی مرستیال یونس قانوني وايي، که سیاسیون او حکومت دسولې مذاکراتو ته په یو غږ او یو صف کې ولاړنه شي، د مصالحې لوبه به په دسیسه او توطیه بدله شي.

نوموړي نن د صبغت الله مجددي په لومړي تلین کې وویل، ټول افغانان سوله غواړي، خو دا چې څرنګه سوله غواړي په دې تړاو اختلافات زیات دي.

نوموړي ویلي، نه یوازې حکومت سوله راوستلی شي، نه یې هم سیاسیون له حکومت پرته راوستلی شي، له همدې کبله د قانوني په وینا اړتیا ده چې د مذاکراتو په مېز د حکومت، سیاسیونو او طالبانو مثلث کېني: (( که سیاسیون او حکومت یو د بل حذفولو ته دوام ورکړي، دا به له افغانانو سره لویه جفا وي.))

نوموړي ټینګار کړی که د افغانستان د اسلامي جمهوریت تر سیوري لاندې د سیاستوالو او افغان حکومت اجماع جوړه نه شي او د سولې واضح تګلاره رامنځته نه شي د سولې او جوړجاړي لوبه به په دسیسه او توطیه واوړي.

دا په داسې حال کې ده چې په دې وروستیو کې امریکا او طالبانو د سولې د هوکړې لاسلیک ته د نږدې کېدو خبر ورکړی دی، خو دېخوا نیوکې دي چې لا هم سیاسیون او حکومت د سولې په رابطه یو نظر نه دي.