له القاعده څخه د پاكستان ملاتړ لوېديځ اندېښمن كړى

خدمتګار ورځپاڼې پخپله نننۍ ګڼه کې لیکلي چې د افغانستان او پاکستان لپاره د امريکا ځانګړی استازی وايي چې اسلام اباد د نوي ډيلي له ډاره د وسله والو ملاتړ کوي چې دې تګلارې يې امريکا او لويديځ هم انديښمن کړي دي.
نوموړي همدارنګه ويلي چې د افغانستان د نا ارامولو لپاره وسله وال له سرحدي سيمو څخه افغانستان ته ځي.
خدمتګار د اسوشيټډ پريس خبري اژانس د یو خبر له مخې لیکي، د افغانستان او پاكستان لپاره د امريكا ځانګړي استازي جيمز ډابينز ويلي چې ترهګرې ډلې افغانستان ته تر اوښتو وروسته وسله وال بريدونه كوي: ((موږ ته جوته ده چې ډير کم شمېر وسله وال پاکستان ته ځي، خو افغانستان ته برعكس له پاكستانه ډېر وسله وال اوړي او پاکستان د وسله والو ملاتړ کوي.))
ښاغلی ډابينز زياتوي، پاكستان په افغانستان كې د هند د نفوذ د مخنيوي لپاره له وسله والو ملاتړ كوي، خو ټينګار كوي چې د هند د نفوذ په اړه د پاكستان اندېښنې پر خپل ځاى دي:(( د افغانستان په ښارونو كې د هنديانو حضور لږ دى او دغه تګ راتګ د اقتصادي او فرهنګي اړيكو د پياوړتيا لپاره تر سره كېږي.))
نوموړي زياته كړې، ښه دا ده چې افغانستان، پاكستان او امريكا د سرحدي تهديدونو د مهارولو لپاره همكاري وكړي.
ډابينز، په ننګرهار كې د هند پر كونسلګرۍ وروستی ترهګريز بريد غندلی او زياته كړې يې ده چې د يوه باثباته افغانستان لپاره په دغه هېواد كې د ناټو ځواكونو موجوديت ته اړتيا ده:((كه افغانان له خپلې خاورې د ناټو ځواكونو وتل غواړي، موږ دا كار كوو، خو حقيقت دا دى چې په افغانستان كې د بهرنيو ځواكونو موجوديت ته اړتيا ده او افغانان د ناټو ځواكونو د پاتې كېدو غوښتونكي دي.))
د امريکا ځانګړي استازي اسلام اباد ته د خپل سفر په ترڅ کې له پاکستان څخه غوښتنه کړې چې د وسله والو له ملاتړ څخه دې لاس په سر شي.
شنونكي په دې باور دي، تر هغه چې په سيمه كې د ترهګرۍ سرچينې وچې نه شي، نو ستونزمنه ده چې په افغانستان كې سوله او ثبات رامنځ ته شي.
په سيمه كې د ترهګرو د پاللو او روزلو اصلي مركز پاكستان ښودل كېږي، خو پاكستان ډېرى وختونه ياد تورونه ردوي، اما په پاكستان كې د طالبانو خوندي پټنځايونو او كوټې شورا موجوديت او تر څنګ يې په دغه هېواد كې  د اسامه بن لادن، الليبي او نورو ترهګرو وژل كېدل هغه څه دي چې پاكستان د ترهګرو ځاله معرفي كوي.