لویه څارنوالي: خلیل فېروزي په کور کې د ملي امنیت لخوا نظربند دی

تاند، یکشنبه، د اسد ۲۷مه:  د لویه څارنوالي وايي، د کابلبانک د فساد مجرم خلیل الله فېروزي دا مهال د ملي امنیت ځواکونو تر کلکې څارنې لاندې په خپل کور کې نظر بند دی.

د لویې څارنوالۍ ویاند جمشېد رسولي نن یوې خبري ناستې ته وویل،  ملي امنیت مکلف دی چې په هرو ۱۵ ورځو کې دوی ته په کور کې د خلیل الله فېروزي د نظربندۍ په تړاو راپور ورکړي.

نوموړي سپیناوی ورکړی چې خلیل الله فېروزي د لنډ وخت لپاره د سختې ناروغۍ له کبله کور ته رسول شوی او تر څو چې روغ شي نو بېرته به زندان ته ولېږدول شي: (( نوموړی به د کابل بانک په دوسیه کې د ځان په اړه ټوله تصفیه ورکوي او څه چې محکمې پرې ثابت کړي دي، پيسې، ټکټانه او قید ټول به لنډوي.))

 رسولي زیاته کړه، خلیل الله فېروزي د یو پلاوي د پرېکړې له مخې له زندانه کور ته استول شوی دی.

په همدې حال کې د ملي امنیت د روغتیايي خدماتو رئیس حشمت الله نوابي تایید کړه چې فېروزي په زندان کې سخت ناروغه شوی و چې د شکرې او وینې د لوړ فشار ستونزه یې ډېره شوې وه.

 په دې ناسته کې د کابل بانک د تصفیې مدیر روح الله حبیب هم وویل، تر اوسه فېروزي ۱۸ میلیونه ډالر پورونه ورته رسولي او ژمنه یې کړې ده چې کور کې د اوسېدو په موده کې به خپل ۵۰ سلنه حسابونه له کابلبانک سره خلاص کړي.

 دا په داسې حال کې ده چې تر دې وړاندې د ملي امنیت پخواني رئیس رحمت الله نبیل ادعا کړې وه چې فېروزي د دولت ساز ټاکنیز ټیم لخوا د ۳۰ میلیونه ډالر رشوت په بدل کې خوشې شوی دی.

 ارګ د نبیل دا خبره بې بنسټه او د ولس غولونې یوه دسیسه بللې وه.

 خلیل الله فېروزي د کابل بانک مؤسس او د دغه بانک د میلیوني فساد په دوسیه کې مجلم پېژندل شوی و چې محکمې پرې لس کاله قید، د قرضونو لنډول او د ټکټانه ایښې وه.

نوموړی یو وار د ولسمشر غني د حکومت په لومړیو کې ضیا مسعود د یو ښارګوټي د پرانیستې لپاره راخوشې کړی و، چې له کبله یې د نیوکو په اساس ضیا مسعود له ولسمشر سره د اصلاحاتو په برخه کې د ځانګړي استازیتوب دنده وبایلله او له حکومته وشړل شو.