محور ورځپاڼه: په محاصره کې راګير لوګريان ګياوې خوري

پاکستانيو او افغان طالبانو له حصارک څخه نيولې د لوګر تر ازرې ټوله سيمه له څلورو مياشتو محاصره کړې ده، دلته د طالبانو لوی لوی مرکزونه دي. دا د چرسو او جلغوزو د عشر سيمې دي، چې طالبان يې ګټه وړي.

په ازره کې د لارو د بندښت له کبله خلک ګیاوې خوري. يوه ۴۹ کیلويي بورۍ اوړه په ۵۰۰۰ افغانۍ، يو ټيم غوړي په ۳۰۰۰ او همدا ډول يو پاکټ نصوار ۶۰ افغانیو ته رسېدلي دي.

قومي مشرانو د حزب اسلامي له قوماندانانو غوښتي، چې د سيمې محاصره ماته کړي او هلته خپل ساتونکي ځای پر ځای کړي.

دوه کاله وړاندې د لوګر ولايت د ازرې ولسوالي د طالبانو له خوا لاندې شوه، خو هغه مهال د حزب يو پياوړي قوماندان مداخله وکړه او خلک يي سره يې را ټول کړل. د حزب اسلامي د یاد قوماندان پلويانو چې له طالبانو سره دوه ځله په سيمه کې مخامخ جګړه هم وکړه، طالبان وګواښل، چې د عام المنفعه پروژو له مخنيوي او د قومي مشرانو له ځورونې لاس واخلي.

ځايي خلک وايي، ځکه يې يوار بيا د حزب اسلامي مرسته غوښتې، چې د دوی ښوونځي يې ور پرانستي وو، اينجوګانو ته يې د سړکونو، پلونو او ښوونځيو د جوړولو اجازه ورکړې وه.

تېر ځل د حزب قوماندانان په ژمي کې د سختې يخنۍ له کبله له سيمې ووتل، خو په پسرلي کې تر راتګ وړاندې طالبانو دغه سيمې لاندې کړې وې.

په ولسي جرګه کې د لوګر استازي انجينر صاحب خان محور ته وويل، ناشونې ده، چې حزب اسلامي دې مرسته وکړای شي، ځکه دا ځل په دغو سيمه کې تر اندازې زيات طالبان له تجهيزاتو سره دېره شوي، چې له منظمو پوځي عملياتو پرته يې شړل نا ممکن بريښي.

د ښاغلي صاحب خان په خبره حکومت د وضعيت د بهبود دروغجن تبليغ کوي: ((يوازې ۲۴ کلي د حکومت په ولکه کې دي، نوره ټوله سيمه د طالبانو په ولکه کې ده.))

د لوګر د ولايتي شورا ځينې غړي وايي، ازره ولسوالي، د ننګرهار له حصارک، پکتيا، کابل او یوه برخه يې له پاړه چينار سره پوله لري، چې درې لارې يې له دريو کلونو راهیسې تړلې وې او يوازې د ننګرهار د حصارک هغه پرانستې وه، چې له تېرو څلورو مياشتو دا لاره هم تړل شوې ده.

پدغو غرنيو سيمو کې ملي پوليس او محلي پوليس دواړه فعال دي، خو سيمه د طالبانو په انحصار کې ده.

ځايي خبريالانو محور ته وويل، اوس مهال ازره ولسوالي د طالبانو له خوا محاصره ده او سيمې ته يې د خوراکي توکو ټولې لارې تړلې دي: ((په ياده سيمه کې هېڅ خوراکي توکي نه پيدا کېږي، يوه ۴۹ کیلويي بورۍ اوړه په ۵۰۰۰ افغانۍ، يو ټيم غوړي په ۳۰۰۰ افغانۍ او همدا ډول يو پاکټ نصوار په ۶۰ افغانۍ هم په ډېره خوارۍ تر لاسه کېدای شي. هغه سيمې چې د طالبانو په ولکه کې دي، هورې په کمه اندازه خوراکي توکي پيدا کېږي.))

دوی وايي، خلک د خوراک لپاره څه نلري، له پټيو ګياوې شکوي او په اوبو کې ورته ځوښ ورکوي.

د لوګر د ولايتي شورا غړی عبدالخالق محور ته وويل، په کابل کې د بيړنيو پېښو د مبارزې کمېټې د ازرې ولسوالۍ له خلکو سره ۳۰۰ ټنه غنم او پنځه ميليونه افغانۍ مرسته کړې، خو دې سيمې ته يې رسول ګرانه چاره ده .

د ښاغلي عبدالخالق په وينا، سږ کال د ازرې ۷۰ سلنه فصلونه سېلابونو خراب کړل: ((ددې سيمې د کښت ډېره برخه چرس تشکيلوي، چې له دې نيولې تر جلغوزو او نورو کرنيزو محصولاتو پورې د ټولو عشر طالبان ټولوي.))

ځايي خلکو محور ته ويلي، چې طالبانو له دې کبله لارې بندې کړې، چې د محلي پوليسو تشکيلاتو کې د سيمې ځوانان د دوی د ټينګار سره سره شامل شول. دوی وايي، حکومت عمليات پلان کړي وو، خو پرې ونه توانېد، ځکه نو د سيمې خلک په محلي پوليسو کې ودرېدل.

د مسوولينو په خبره په ازره ولسوالۍ کې طالبانو ګرځنده ټليفون بند کړی دی.

تقريباً درې مياشتې وړاندې د ترکي شرکت د يوې الوتکې کارکوونکي هم د ازرې طالبانو وتښتول، چې وروسته بيا ترکان يې خوشي کړل او افغان او يو بهرنی لاهم ورسره بنديان دي.