ملا هیبت الله د کوچلاغ په الحج جومات کې ۱۵ کاله تدریس کاوه

تاند- رویټرز خبري اژانس وايي، د طالبانو اوسنی مشر ملا هیبت الله اخوندزاده ۱۵ کاله د پاکستان د بلوچستان ایالت په یوه مدرسه کې تدریس کاوه، خو د سږ کال په مې میاشت کې ناببره بې درکه شو.

د بلوچستان په کوچلاغ  کې د الحج جومات طالب زده کوونکو رویټرز خبري اژانس ته ویلي چې ملا هیبت الله په ښکاره تدریس کاوه.

کوټې ته نژدې په کوچلاغ کې د هیبت الله د اوسېدو په اړه مخکې څه نه و ویل شوي خو اوس د دې موضوع افشا کېدا پر پاکستان نور هم فشار زیاتوي.

تر هیبت الله مخکې د طالبانو مشر ملا اختر محمد منصور هم په پاکستان کې اوسېده او همالته ووژل شو.

همداراز اسامه بن لادن په ایبټ اباد کې ووژل شو او د ملا عمر په اړه هم ویل کېږي چې تر پایه په پاکستان کې اوسېده او همالته ووژل شو.

  د مې په میاشت کې د منصور پر ځای د هیبت الله اخوند زاده له ټاکل کېدو وروسته نوموړی بې درکه دی او ویل کېږي چې پاکستان او طالبان وېره لري چې امریکا به یې د منصور په شان په نښه کړي.

رویټرز خبري اژانس وايي چې د پاکستان د کورنیو چارو وزارت په کوچلاغ کې د ملا هیبت الله اخوند زاده د اوسېدو په اړه د دغه اژانس د پوښتنې ځواب ورنه کړ. او د پوځ ویندوی ورته وویل چې په دې اړه نه غواړي څه ووايي. خو د بلوچستان ایالت د کورنیو چارو وزیر سرفراز بوګټي (بکټي) وویل چې په خپل ایالت کې د طالبانو موجودیت په کلکه ردوي.

رویټرز د الحج جومات او مدرسې د ګڼو استادانو او شادګرادنو په قول د ملا هیبت الله کیسې رااخیستي او ویلي یې دي چې د نوموړي نوم اوس هم په خطاطي شوې بڼه پر دېوال لګېدلی دی.