ملا ولي په ټولنه کې خپل اهمیت له لاسه ورکړی!!؟ شاداب شبیر

يوه ملګري مې وويل: کله چې څوک ايت يا حديث ووايي او ځان ملا، ملا کړي او يا له دين نه خبرې وکړي؛ زړه مې ورېږدي او باور مې پرې ختمېږي. دا ټول د ملا صيب له لاسه چې د دين په جامه کې يې هر څومره د بې دينۍ کارونه وکړل! بل زوړ مجاهد يار مې بيا نعتونه هم نه اوري؛ خو که څوک يې غږوي، دی يې ورته د بندولو حکم کوي. ترې ومې پوښتل ولې دا کار کوې؟ ځواب يې سم و. ويل يې چې دا د ملايانو ترانو ته ورته او د هغوی ترانه ويونکو په خپل غږ کې ويلی دی، ځکه مې نه خوښېږي.

ډېر داسې خلک نورهم پېژنم، چې له ملا سره ناسته ولاړه خپل کمی ګڼي او په ملګرتيا يې شرمېږي. دا ټول د وخت او حالاتو زېږنده ده او بايد همداسې وي؛ خو ملا زموږ په ټولنه کې لوړ مذهبي مقام درلود او اوس هم د ريښتنيني ملا په اړه همداسې ده. ځکه رسول الله صلی الله عليه وسلم فرمايي: (علما د انبياوو وارثان دي.) يا (د عالم فضيلت په عابد داسې دی لکه زما فضيلت ستاسو پر ادنی سړي! ) اوس په ټولنه کې همدغه شته ملايان د وخت عالمان دي.

 رسول الله صلی الله عليه وسلم د ريښتونو علماو په اړه ويلي دي؛ نه د هر کجابودي ګمراه په اړه. تر ډېره دې کجابوديانو په ټولنه کې له دين نه په ګټنې خپل راج او حاکميت وچلاوه او اوس هم غواړي له دې لارې خپل کار ته دوام ورکړي؛ خو اوس د سکې دواړه مخه خلکو ته ښکاره شول.

په ټولنه کې د ملا هغه ځای او هغه مقام نه دی پاتې او دا يې له خپله لاسه!!! خدای بښلي بجليګر دا حقيقت تر ټولو ښه درک کړی و. هغه ويلي دي: (ملايان هم په هغو پخوانيو اودسونو کې نه دي پاتې؛ اوس د دوی له پاينڅو نه هم موتيازې روانې دي.) په عوامو کې له پخوا مشهوره ده، چې: (ملا څه ويل هغه منه؛ خو چې کول يې هغه مه کوه!) خو اوس خلک دې ته راغلل چې مه يې منه او مه کوه! دا رنګه : (ملا وينه کور يې مه وينه ) ځکه هغه د الفت صيب خبره په بازار کې انګور نه خوري او په کور کې د شرابو ډک بوتلونه په سر اړوي. د هر چا په اړه هر څه وايه؛ خو د دې طبقې په اړه به د اصلاح په نيت يوه خبره هم نه کوې. ځکه ارواښاد غني هم ډېر په احتياط سره نيوکه پرې کړې: ( زما بادار وې زما توکړي خور شوې! ) تر دې دمه لا هم غني په همدغې ګنا د ملا په نزد کافر دی.

زه غني نه ملامتوم، کېدای شي ملا له همغې زمانې په انحراف پیل کړی وي. اخر ملاجان خپل موقف په ټولنه کې ولې دومره راټيټ کړ؟؟؟

حقاني او ريښتيني علما خو په اسلام او دين سر ورکوي؛ خو کړنې يې روښانه او اسلامي وي. دوی په دين کې زموږ لارښوونکي او شارحين دي. الله په خپل سپېڅلي کلام کې ويلي دي: ( په تحقيق سره د الله په بندګانو کې له هغه څخه وېرېدونکي بنده ګان علما دي.) خو هغه علما چې وايي يو څه او کوي بل څه بيا هم الله ورته داسې خطاب کوي.( د خره په شان دي،چې کتابونه پرې بار کړې!) هغه د رحمان بابا خبره سمه ده چې وايي:

تاته رب د ملايکو مقام درکړ ــ ته دا خپل صورت په خپله ګاو خر کړې

 ملا صيب سره د فتوی و هيڅ کمی نه شته. په هره خوا کې چې د ده ګټه وي هماغسې به دلايل برابروي. د تورات په تحريف کې هم تر ډېره د هغه وخت د ملايانو لاس دی.

 د ټولنې يو شمېر خلک هم لکه چرګان او ګډې يا پسونه. له عقله به کار نه اخلي بس په ملاګوټي پسې به منډې وهي. په دې بيا سوچ نه کوي، چې ملا صيب د خپل زوی لپاره ګيدړ حلال او د نورو لپاره مردار بولي. ( چې پکې وي نور جمال، هغه ګيدړ به وي حلال!!! ) ميوند فدا يې هم ژړولی: په ټنګه به شې کافر يا مسلمان ــــــــــ لرم دغسې ښه فن لکه ملا يوه ورځ يو ملاصيب، چې د بې ګناه مسلمانانو په وژنه اوس هم صرفه نه کوي؛ داسې وويل: يو سياسي ملا وي او بل اخوند پيتي. ده هغه ملا چې په کلي کور کې وظيفې ،سرسايې، زکات او خيرات ته پروت او خپل ژوند په کوډو تعويزونو تېروي او دين د پيسو لپاره د څو جاهلانو په پښو کې اچوي ملامت کړ. خو دی هم والله که د چا په زړه کې ځای ولري يا دين ته خدمت وکړي. وايي: ( لډو په منځ نيم که بيا د دواړو تر منځ توپير وکه!) د سياست په ډګر کې هم د دوی اودس مات دی. بس د پيسو يو سېلاب پرې راخوشې دی او دين يې نړيوالو ته کم معرفي کړ.

اسلام زماني او مکاني وېش نه مني؛ خو ملاصيب دا خبره هم پکې راووېسته! په هره چاره کې مو يو بام دوه هوا اورېدلي و؛ خو په دين کې اوس ملاجان تطبيق کړه. په دين کې لارې؛ په هره مسله کې بېلې، بېلې لارې، يو پر بل رد او ارتداد ويل، په دين کې انتشار او په اسلامي امت کې انتشار جوړول له ملاجان پرته د بل کار نه دی.

 په خيبر پښتونخوا کې مې له يو تش په نوم افغان ملاګوټي سره مباحثه شوه. ما ويل په افغانستان کې ټول پاکستاني طالبان د افغان حکومت پر ضد جنګېږي. ملاګوټي په ډېرې بې پروايۍ سره وويل: – بس په افغانستان کې خو جهاد دی که هر څوک يې کوي ثواب دی .که پاکستانی وي او که بل.

! – ولې جهاد په پاکستان کې نه شته؟

– نه!!! –

 ولې- دلته له چا سره جهاد وکړي؟

 – خو په دې تاڼو دې او پوځي چوڼيو دې ورځي کنه!!!

– دوی خو مسلمانان دي، لمونځ کوي، کليمه وايي!

– دا زموږ اردو او پوليس لکه چې هندوان دي يا لمر خاته ته ودرېږي؟

 – هغه خو مستعمره ده، امريکايانو نيولې ده د کفر قانون دی پکې!

– افغانستان د کفارو مستعمره ده که پاکستان؟ که پاکستان مستعمره نه وه؛ افغانستان کله هم نه مستعمره کېده!!! په افغانستان کې د بې ګناه ولس د بمبارد لپاره پوځي هډې چا ورکړې؟ همدا اوس د ناټو نوي سلنه اکمالات له کومې لارې کېږي؟ همدا تاسو له افغانستانه چا ورک کړئ؟ زموږ اساسي قانون دا دولس کاله کېږي، چې ستاسو په وينا د کفر؛ خو د پاکستان بنسټ له پيله د کفر په قانون او لاسونو ايښودل شوی دی! له سره رواخله تر پايه ستاسو په سړک چپ لاس تګ، د اتوار رخصتي، ټوله اسلامي نړۍ اختر کوي او تاسو ځان ترې بېل ګڼئ، په ښکاره د حسن جان له مدرسې سره جوخته کليسا، له اسلام اباد څخه په راډيو او تلوېزيون عيسويت ته تبليغ او دعوت او په ښکاره مورده ګاو خانې چېرته دي؟

 – خو ملا ټوزبرخان بيا وايي دا هسې خبرې دي

! – نو ولې هسې خبرې دي ته راته ووايه کنه؟

 – بس خو هسې خبرې دي! نو دا خو راته نه شي ويلي کنه، چې دا خبرې د ای، ايس ای په قانون کې نه شته ،زما د خدای له قانون سره څه ؟ زه خو د اي ايس ای په مذهب يم. که دا مذهب پرېږدم بيا به پيسې څوک راکوي؟ بس خو د ملاصيب دين او مذهب پيسه ده، که يې اوس هم نه منئ تاسو پرې يو امتحان وکړئ.

————————————————–

تاند: تاسي لوستونکي د دې لیکنې له لیکوال سره څومره موافق یاست؟ خپل نظر ولیکئ.