ملي امنیت په میدان وردګو کې ۳ تنه ترهګر نیولي دي

تاند: – ملي امنیت لوی ریاست مطبوعاتي دفتر د چارشنبې په ورځ تاند ته په رالیږلې اعلامیې کې په میدان وردګو ولایت کې د دریو ترهګرو د نیولو خبر ورکړ.

سرچینه وړاندې وايي د ملي امنیت موظفینو د میدان وردګو ولایت اړوندو سیمو کې د ترهګریزو او ورانکارو فعالیتونو د ترسره کولو په تړاو د یو لړ ځانګړو عملیاتو او د خلکو په همکارۍ یاد کسان نیولي دي.

دغه ریاست دغه راز وايي نیول شویو کسانو په خپلو لومړنیو څیړنو کې په خپلو جرمونو اعتراف کړی او ویلي یې چې د میدان وردګو ولایت او اړوندو ولسوالیو کې یې د تیلو د ټانکرونو سوځولو، د سړک غاړې مای ایښودلو، د اشخاصو په ترور، ورانکارو او ترهګریزو فعالیتونو، طالبانو ته د کسانو په جلب او جذب او د پیسو په راټولولو کې فعاله ونډه درلوده.

یاده دې وي، چې ملي امنیت د نوموړو نیول شویو کسانو د نیولو ځای، وخت او هویت په اړه څه نه دي ویلي.