تاند- نامعلومو وسله والو کسانو د بلوچستان ایالت مرکز کوټې ښار ته نژدې د طالبانو یو مهم قوماندان وواژه.
د پاکستان ایکسپریس تریبیون ورځپاڼې نن /جمعه/ د دوو طالب مشرانو له قوله وویل چې ملا اختر محمد منصور ته وفادار قوماندان مولوي محمد علم پرون /پنجشنبه/ ماښام کوټې ته نژدې په کوچلاغ کې وویشتل شو.
کوچلاغ له کوټې ښاره ۲۵ کیلومتره لېري سیمه ده.
ایکسپریس تریبیون وايي، دا خبره ورته دوو طالب مشرانو کړې او د هغوی نومونه ځکه نه څرګندوي چې له رسنیو سره د خبرو کولو اجازه نه لري.
د طالبانو یوه مشر غړي وویل:«مولوي محمد علم ووژل شو. تحقیقات روان دي خو موږ په دې اړه چې چا به وژلی وي، معلومات نه لرو.»
تراوسه پوري کومې ډلې د مولوي محمد علم د وژلو مسوولیت په غاړه نه دی اخیستی.
ایکسپریس تریبیون ورځپاڼې ته د طالبانو سرچینو ویلي چې مولوي علم په زابل کې د طالبانو د جلا شوې ډلې ملا محمد رسول خلاف په خونړیو جګړو کې د ملا اختر محمد منصور د ډلې د جګړې مشري کوله.
طالبانو پخوا په کوټه کې د خپلو یو شمېر غړو د وژلو تور د افغانستان پر استخباراتي ادارې (ملي امنیت) پوري کړی دی.
خو ایکسپریس تریبیون د طالب سرچینو له قوله وايي چې مولوي محمد علم ممکن د ملا رسول پلویانو ترور کړی وي.
د مولوي علم په اړه ویل شوي چې په زابل کې یې د طالبانو په منځ کې زیات نفوذ درلود او ډېر شمېر بهرنیو سختدریځو ته یې پناه ورکړې وه.
(عکس د مولوي محمد علم دی)
څوک چی د بل ګټو لپاره کار کوی همدایی حال وی راشی خپل هیواد ته او د خپلو خلکو څنګ کی ودریږی او دا هیواد اباد کړی ولی بیځایه مړه شو.