نامعلومو کسانو د کندهار د یوې لېسې زده کوونکې له تښتولو وروسته په بې رحمۍ وژلې

تاند- نامعلومو وسله والو په کندهار کې د لېسې یوه زده کوونکې له تښتولو وروسته په خورا بې رحمۍ وژلې ده.

د لیکوالې مینه انتظار خور دوې اوونۍ پخوا په داسي حال کې چې ښوونځي ته روانه وه، د نامعلومو کسانو له لوري وتښتول شوه او کورنۍ یې پرون/ سې شنبه/ خبره شوه چې مړی یې موندل شوی دی.

تر اوسه پوري د دغه قتل انګېزه نه ده څرګنده شوې او د کندهار امنیتي چارواکو هم څه نه دي ویلي.

مینې انتظار په خپله فېسبوکپاڼه کې لیکلي:« دوې اونۍ مخکي سهار د ښوونځي په لور رهي سوه او بيا کور ته راستنه نه سوه. له ورکېدو څلور ورځي وروسته ئې د کندهار د ډنډ ولسوالۍ د ابراهيم خليفه بابا سيمي په ريګو کي جسد موندل سوی و، چي د وجود غوښي ئې حيواناتو خوړلي وې. »

دې د خپلې وژل شوې خور په اړه همداراز لیکلي چې درویشت کلنه او د یوولسم ټولګي زده کوونکې وه.

مینه انتظار همداراز لیکلي«زما معصومه خور ئې په ډېر وحشت شهيده کړې وه. ريښې ريښې وجود ئې لس ورځي د روغتون په يخچالونو کي پروت و. موږ ئې تر ورکېدلو ۱۲ ورځي وروسته خبر سوو.»

مېرمن انتظار همداراز ویلي چې د دې د خور قاتلان معلوم دي خو انتظار باسي چې حکومت د دې د خور له قاتلانو سره څه کوي.

دې د خپلې خور د قاتلانو نومونه نه دي ښوولي.

دا قضیه له دې کبله هم د زیات اهمیت وړ ده چې په کندهار کې شوې چې د ښځو د تعلیم په وړاندې خنډونه زیات دي او دا ډول پېښې د ګڼو نورو نجونو د زده کړو مخه نیولی شي.

(عکس د مقتولې دی)