وردک خپل سیال ته ماتې ورکړه او پنجشېر مساوي کړه

نن د بابای ملت ایلیټ جام سیالیو کې کونړ د میدان وردګ پر وړاندې ماتې وخوړله او پکتیکا له پنجشیر سره لوبه مساوي پای ته ورسوله

د بابای ملت ایلیټ جام ولایتي سیالیو په ترڅ کې نن د میدان وردګ لوبډلې د کونړ پر وړاندې ماتې ومنله او له بله پلوه پکتیکا خپله سیالي له پنجشیر سره برابره پای ته ورسوله.

لومړۍ لوبه چې د ننګرهار په غازي امان الله خان نړیوال لوبغالي کې په لاره اچول شوې وه د کونړ او میدان وردګ لوبډلو ترمنځ وه. ددغې لوبې پچه د کنړ لوبډلمشر وګټله او لوبه یې پیل کړه. دوی په ۴۱ اورونو کې د ټولو لوبغاړو په سوځیدو سره ۱۷۲ منډې جوړې او میدان وردګو ته یې د ۱۷۳ منډو هدف ورکړ چې له ډلې یې بلال ۴۵ او سیدالرحمن ۳۳ منډې جوړې کړې. د میدان وردګ لوبډلې له لوري سیف الله د سیالې لوبډلې ۳ لوبغاړي وسوځول.

د میدان وردګ لوبغاړو ورکړل شوی هدف د لوبې په ۳۴ اوور کې د ۳ لوبغاړو په سوځیدو سره بشپړ کړ چې له ډلې یې بابر ۸۸ او توریال ۲۹ منډې جوړې کړې. د کونړ توپ اچونکو له لوري ابراهیم ۲ او هجران هم دوه لوبغاړي وسوځول.

بابر د سیالۍ غوره لوبغاړی ونومول شو.

بله سیالي چې په زرملوال لوبغالي کې ترسره شوه، د پکتیکا او پنجشیر لوبدلو ترمنځ وه. د لوبې پچه د پکتیکا لوبډلمشر وګټله او پنجشیر ته یې د توپوهنې بلنه ورکړه. د پنجشیر لوبډلې د لوبې تر ۴۲ اووره د ټولو لوبغاړو په سوځیدو د پکتیکا لوبډلې ته د ۱۷۸ منډو هدف ورکړچې له ډلې یې حیات الله ۵۰ او منصور ۳۸ منډې جوړې کړې. د پکتیکا توپ اچونکو لخوا امان الله ۳، حمید ۲ او صدرالدین هم د سیالې لوبډلې ۲ لوبغاړي وسوځول.

پکتیکا لوبډلې بیا لوبه تر ۳۹ اووره وغځوله او د ټولو لوبغاړو په سوځیدو سره یې ۱۷۸ منډې جوړې او سیالي یې له پنجشیر سره برابره کړه. ددوی له لوري زاهد ۴۲ او جمشید ۳۷ منډې جوړې کړې. د پنجشیر توپ اچونکو له لوري پرویز د پکتیکا ۷ لوبغاړي وسوځول.

د افغانستان کرکټ بورډ اجراییوي رئیس ډاکټر نورمحمد مراد د سیالۍ له بریالي پرمختګ او په دغه بهیر کې یې د لوبغاړو له اغیزمنې ونډې ستاینه وکړه. نوموړي زیاته کړه چې د افغانستان کرکټ راتلونکی به د خدای ج په مرسته تر دې هم روښانه وي.