ولسمشر کرزي د مشورتي لویې جرګې د جوړېدو په خاطر د امنیتي کمیټې د جوړولو حکم وکړ

تاند: خبریال (ابوبکرجبارخېل)- ولسمشر حامد کرزي د سې شنبې په ورځ د مشورتي لويې جرګې د جوړولو او د تياري بهير د امنيت د ټینګښت په موخه د امنيتي کميټې د جوړولو په باب حکم صادر کړ.

ولسمشر کرزی په داسې حال کې د لویې جرګې د امنیتي کمېټې د جوړولو حکم ورکوي، چې روانه اوونۍ د دوشنبې په ورځ یې خبریالانو ته وويل چې له امریکا سره د امنیتي تړون په اړه د مشورې لپاره به د یوې میاشتې په ترڅ کې لویه جرګه را وغواړي.

ولسمشر کرزي ويلي له امریکا سره د دې تړون لاسلیک ته نږدې شوي، خو لا هم يو شمير شرايط شتون لري چې امریکا دې ومني او په خبره یې له امریکا سره د امنیتي تړون لاسلیک وروستۍ پریکړه د افغانانو په لاس کې ده او له همدې امله به تر یوې میاشتې پورې لویه جرګه را وغواړي.

ښاغلي کرزي زیاته کړه، که امریکا د افغان حکومت شرایط ومني، نو د تړون لاسلیک د هېواد په ګټه ده. هغه زیاتوي: (( د افغانستان خلک غواړي چې له لویدیځ او امریکا سره په معامله کې وي، خو دا ملګرتیا او معامله باید د افغانستان ملي ګټې تضمین کړي، د افغانستان ملي ګټه امنیت دی، افغانان باید هم د ترویزم او طالبانو له حملو څخه خوندي وي او هم د امریکا او د هغوی د متحدینو له بمباریو او سړغړونو، همدا دلیل دی چې تراوسه موافقې ته نه یو رسیدلي، انشاالله د یوې میاشتې په ترڅ کې به لویه جرګه را وغواړو او هره پریکړه چې خلکو وکړه طبعي خبره ده چې حکومت یې مني.))

د چارو د ادارې او د وزيرانو شورا د دارالانشا لوى رياست وايي ولسمشر په دې حکم کې د مشورتي لويې جرګې د ډاډمن امنيت د ټینګښت او د لازمو تدابیرو او همغږۍ په خاطر مراتب منظور کړي دي، چې د کمېټې مشر د کورنیو چارو وزارت امنیتي مرستیال ستر پاسوال محمد ایوب سالنګي ټاکل شوی دی.

دغه راز د چارو د ادارې او د وزيرانو شورا د دارالانشا د لوى رياست کارپوه لوى پاسوال محمد اسلم مسعود د کمیټې د مرستیال، د ملي امنيت د لوى رياست اوپراتيفي مرستيال بريد جنرال محمد مسعود اندرابي، د ملي دفاع وزارت د اوپراسيون مشر تورن جنرال افضل امان، د لوړ رتبه دولتي رجالو د ساتنې او امنيت د رياست اوپراتيفي مرستيال بريد جنرال سيد اسدالله مشکوري او د ولسمشر د شخصي محافظت د رياست مرستيال بريد جنرال عبدالاحمد د کمېتې د غړو په توګه ټاکل شوي دي.

د سرچینې په وینا امنيتي کميټه موظفه ده چې د لويې جرګې د جوړولو د بهير امنيت په خپل کاري لومړيتوب کې ونيسي او د مشورتي لويې جرګې د جوړولو د ډاډمن امنيت د ټینګښت لپاره دې لازم او سملاسي تدابیر ونيسي او بیا دې عملي کړي.

سرچینه ډیروي امنيتي کميټه موظفه ده چې د دغه حکم په نافذيدو سره چې د جرګې په حريم پورې د اړوندو ودانيواو تاسيساتو ډاډمن امنيت تامين او د لويې جرګې د جوړولو سيمې ته په نږدې سیمو کې امنيتي پوستې جوړې او د هغه د اجرااتو څخه په جدي توګه څارنه وکړي او همداراز کميټه د خپلو اجرااتو د څرنګوالي په باب په دوامدار ډول د مشورتي لويې جرګې د جوړولو لپاره د تياري د کميسيون دارالانشا مشر ته رپوټ ورکړي.

په همدې حال کې د مشرانو جرګې یو شمیر غړي د دې جرګې د جوړېدو هرکلی کوي. سناتور هدایت الله رهايي وویل: (( د لويي جرګې جوړول یو ښه اقدام دی او افغان دولت هم باید امنیتي توافقاتو د یوې لويی جرګې په رابللو سره ترسره کړي ځکه چې افغانستان په اساس شرایطو کې دی او داافغانستان خلک مجبور دي په راتلونکی کې د یو قوي او نړېوال هېواد په څنګ کې وي که څه هم ځینې کړۍ موجودی دي چې هڅه کوی لويه جرګه جوړ نه شي خو د لويي جرګې جوړول د افغانستان د خلکو په ګټه ده.))

په ورته وخت کې امریکا لا هم هیله منه ده چې د افغانستان او امریکا ترمنځ د امنیتی تړون په اړه هوکړه به په راتلونکو څو اونیو کې ترسره شي او وايي چې په دې اړه پرمختګ هم شوی دی.