پاکستانۍ ورځپاڼه: طالبان د سولې د خبرو پر پیلولو سلامشوره کوي

تاند- د پاکستان ایکسپریس تریبیون ورځپاڼه ادعا کوي چې د افغان طالبانو په منځ کې د سولې د خبرو د پیلولو په اړه جدي مشورې روانې دي.

ایکسپریس تریبیون ورځپاڼې په نننۍ /پنجشنبه/ ګڼه کې د طالبانو په قول ویلي چې د دې ډلې مشرانو د سولې د خبرو د پیلولو په اړه په افغانستان کې له خپلو جنګي قوماندانانو سره هم مشورې کړي دي.

ورځپاڼه وايي، د طالبانو یوه مرکچي، د نوم د نه څرګندېدو په شرط د سکایپ له لارې ورته وویل«حاضردمه موږ له بهرنیو خواوو او همداراز له افغان لوري سره د خبرو د پیلولو په باب ږغېږو.»

ده همداراز وویل«دا به په ملي یا د افغانستان په کچه پرېکړه وي. د سلا مشورو دا پروسه پراخه ده، د طالبانو پوځي قوماندانان، چې له موضوع خبر نه ول، خبر کړای شوي دي. ویلی شم چې دا ځل په سلامشورو کې ټول شامل کړل شوي دي.»

د ورځپاڼې په ادعا دغه طالب مشر دا هم وویل چې دا خبره سمه نه ده چې طالبان د افغانستان د مسلې حل له پوځي لارې غواړي.

دې ته په پام چې د سولې په اړه دا راپور د ژمي په درشل کې خپرېږي، چې جګړه هم ورسره سړېږي او هر کال ژمی د سولې په اوازو تېرېږي، ښايي ډېر لږ افغانان پرې باور وکړي.

دا احتمال هم شته چې دا ډول خبرې له هغو هڅو څخه د افغانستان د حکومت د راګرځولو لپاره شوي وي چې پر اساس یې د طالبانو مشر په تور لیست کې شاملېږي.

د افغانستان ولسمشر په وروستیو کې وویل چې د ملا هبت الله اخوندزاده او نورو هغو طالبانو نومونه دې د ملګروملتو په تور لیست کې شامل شي چې د سولې مخالفت کوي.

ایکسپریس تریبیون د دغه بې نومه طالب مشر له قوله دې مسلې ته په اشارې ویلي«موږ فکر کوو چې د کابل حکومت دا هلې ځلې د سولې په لاره کې د خنډ جوړولو په هدف کوي. زموږ په باور دا ډول هڅې د سولې پر ضد دي. له دې داسي ښکاري چې حکومت په سیاسي پروسه کې صداقت نه لري.»

پاکستاني رسنۍ عموماً سولې ته د طالبانو د حاضرېدو په اړه خبرونه خپروي خو وروسته یې وسله وال طالبان ردوي.

د دې تازه خبر په اړه وسله والو طالبانو تراوسه څه نه دي ویلي.