تاند- غزني ښار ته نژدې نن /جمعه/ لږترلږه ۶ ماشومان ووژل شول.
د دغو ماشومانو د وژل کېدو د څرنګوالي په اړه ضد و نقیض راپورونه ورکول کېږي.
چارواکي وايي چې دا ماشومان د طالبالنو له لوري په ویشتل شوي راکټ وژل شوي دي.
د غزني ولایتي چارواکي او د ولایتي شورا غړي وايي چې د طالبانو له لوري د هاوان ویشتل شوې ګولۍ پر یوه کلي ولګېده چې په نتیجه کې یې ۶ ماشومان ووژل شول او ۲ نور ژوبل شول.
خو وسله وال طالبان بیا وايي چې دا ماشومان د افغان هوايي ځواک په بمبارۍ کې وژل شوي دي.
د غزني امنیه قوماندان محمد زمان خبریالانو ته وویل«ماشومانو د یوه کور په حویلۍ کې لوبې کولې چې د طالبانو له لوري ویشتل شوی هاوان پرې ولګېد، ۶ تنه ماشومان ووژل شول او ۲ ژوبل شول.»
د دفاع وزارت مرستیال ویندوی محمد رادمنش هم طالبان د ماشومانو د وژل کېدو مسوول وبلل«بیخي په زغرده ویلی شو چې د طالبانو له لوري په ویشتل شوې مرمۍ ووژل شول.»
رادمنش دا هم وویل چې د هاوان ویشتونکی طالب د افغان امنیتي ځواکونو له لوري ووژل شو او وسله یې ضبط شوه.
د طالبانو ویندوی ذبیح الله مجاهد وايي چې ۷ ماشومان د افغان هوايي ځواک په بمبارۍ کې وژل شوي او ۶ نور ژوبل دي.
مجاهد همداراز وايي چې د ماشومانو کور نړېدلی دی.
د دفاع وزارت یوه چارواکي رویټرز خبري اژانس ته ویلي چې د دوی د هوايي ځواک په بمبارۍ کې ۳ ملکیان وژل شوي خو له دې نه دی خبر چې دا کسان څوک دي او دقیقاً د غزني په کومه سیمه کې وژل شوي دي.
یو خو به حتما دروغ وایي، یا غني ګی یا ملا هیبتک، اخخخ چې واک مې وی …. (:(:(: