ښاغلي حکمتیار صاحب ته پرانستی لیک! افغان محصل

 ښاغلیه مشره  ! زما له اړخه سلامونه اونیکې هیلې ومنه ،ستاسو د ښه صحت په هیله،  غواړم یو څو ګیلې او مشورې د یو لیک له لارې درسره شریکې کړم، که څه هم زما عمر ،علمي سویه او تجربه ددې اجازه نه راکوي، چې ستاسو  په حضور کې دومره جرات وکړم ، خو د نصرت مینې د یو اوسیدونکي په صفت غواړم، چې تاسو د یو لړ ستونزو او مشکلاتو څخه خبر کړم

 ښاغلیه مشره ! ستاسو  په علمي ،جهادي او سیاسي مبارزه  باندې ویاړم، او د مهربان خدای دربار ته لاسونه لپه کوم ،چې خپل ټاکلي هدف ته په سر لوړي ورسیږې

ښاغلیه مشره  !  تاسو ډیر وخت کیږي چې له صحنې لرې یاست، د نړۍ او افغانستان حالت  به  له نږدې څاري خو د نصرت مینې له حالتو به مو زه خبر کړم

 ښاغلیه مشره ! نصرت مېنه اوس د ضد بازیو او تعصبونو مرکز ګرځیدلی دی، مذهبي او سیاسي اختلافات اوج ته رسیدلي دي، مذهبي اختلافات علماوو او سیاسي اختلافات د اجرایه شورا ښاغلیو  رامنځته کړیدي، مذهبي اختلافات په وهابي او حنفي دایره کې قرار لري، او سیاسي اختلافات د مجاهدینو اواجرایه شورا ترمنځ ښه په درز کې  روان دي، مجاهدین وایي چې تر پرونه جهاد وو نن  هم باید  جهاد وشي، او دغې  لړۍ ته تر هغې دوام ورکړل شی، تر څو خپلو موخو ته ورسیږو، د اجرایه شورا ښاغلي وايي، چې مونږ باید دواړو مبارزو ته دوام ورکړو، په رایه  او ټوپک دواړو جهاد وکړو،  ماته دلته د مجاهدینو موقف قوي ښکاري، که دغه سیاسي مبارزه مو پخوا شروع کړي وائ ، شاید نتیجه یې تر نن  غوره وائ، خو تاسو  په داسې شرایطو کې میدان ته روادنګل چې  زما په خیال  ګټه نلري، خو  تاوانونه يې ډير دي، کیدی شي چې موجوده اختلافات څو چنده نور هم اضافه کړي، شاید تاسو     اوس  هم اوس هغه شهیدانو او زندانیانو ته  ځواب ونلری چې ستاسو په هدایت یې ځانونه قرباني کړل، ستاسو دا  اوسني موقف مونږ ته دا په ګوته کوي،چې ارغندیوال،سباوون او مولوي عطا الله لودین چې اوس د موجوده نظام غړي دي د وخت مطابق ښه پریکړه کړې وه خو ستاسو په دې ګناه له تنظیم وشړل.

 ښاغلیه مشره ! ستاسو په اجرایه شورا کې هغه ښاغلي ناست دي، چې ځانګړې سیاسی او اقتصادي موخې لري، د شخصی ګټو په خاطر ستاسو تر څنګ ولاړ دي، که نن يې شخصي ګټي له منځه  ولاړې شي باور وکړه، چې تر ټولو اول به همدا ښاغلي ستاسو ستاسو ګریوان ته لاس اچوی، ډیر خو ستاسو ځای ناستی ته غله دی ، مونږ ګورو چې اوس هم  د حزب اسلامي له مالونو شخصي ګته پورته کوي، او په خپ��ه ګټه يې کاروي،تاسو هم د کرزی صاصب په شان یو څو مشخص غړي لرئ، کله يې یو ریاست ته ولیږئ ،او کله يې بل ریاست ته!  دوی هم ځانونه میراثي بولي او هر څه يې چې زړه وغواړي  کوي یي،  داسې څوک نشته چې له دوی سره حساب او کتاب وکړي،چې ښه مثال یې هغه د انجونو لپاره د پاکستان تعلمي برسونه(سکالرشیپونه) وو، چې پخپلو منځونو کې یې سره وویشل اود حزب اسلامي نور غړي  ترې خبر هم نشول په همدې شان یې نور هم ډیر مثالونه شته چې ترې تیریږو

ښاغلیه مشره ! په نصرت مېنه کې  د  اوبو  او بریښنا لویه  ستونزه رامنځته شویده ، چې دا هم  د اجرایه شورا د ښاغیلو معاملې دي ، د دوي کورونو ته په ټنکرونو(تانکونو) کې اوبه ورځي، ولې بیچاره خلک اوبو پسې ړاندیږي  د دې ښاغلیو د بریښنا بیلونه فري(مفت) دي، ولې دبیچاره خلکو بیلونه دوه چنده وي ،اوس هم په میلیونونو دبریښنا د بیل روپي ورکې دي او  دغه به د غریبو اوبیچاره خلکو  له جیبه وځي

ښاغلیه مشره ! داسې کړنې په ځوان نسل ډیر منفی تاثر غورځوي او ورځ تر بلې فاصله رامنځته کوي او د دوی ذهنونو کې قسمه قسمه پوښتنې مطرح کوي، ځوانان چې د یو ملک او تنظیم د ملا  تیر بلل کیږي، له ستاسو څخه تیښتې په حالت کې دي ، هغه څه چې اوس په تنظیم کې روان دي دوي ته زغملو وړ نه دي،تاسو باید نوره ټوله  توجو ځوان کهول ته واړوي ازمویل شوو ته بیا د ازمویښت موقع مه ورکوي

   څو مشوري

 ۱. ډیر خلک  په دې ګمان دي، چې حکمیتار صاحب دیکتاتوره مفکوره لري، او هر وخت خپلو پریکړو ته اولیت ورکوي.

 ښاغلیه مشره! انسان نیمګړی دی، انسان د دې وړتیا نلري چې ټولو پریکړې دې په خپله په  سمه توګه وکړي،  نو ستاسو د درانه حضورڅخه په درنښت هیله کوم چې په ملی ستونزو او مسایلو کې د مسلکې، هیواد پالو ، اسلامي او ازادو مفکورو خاوندونو سره مشوری وکړئ چې دا به هم ستاسو په ګټه وي او هم ددې مظلوم ملت

۲. تاسو یو نړیوال جهادي او سیاسي شخصت یاست، په ډیر وړو معاملو کې مه ښکیل کیږي ، دغه ستاسو شخصت ته صدمه رسوي، چې یو ښه مثال يې ستاسو اوسنۍ پریکړه وه چې د قطب الدین هلال ملاتړ مو اعلان کړ،دهلال صاحب شخصیت ته  زه احترام لرم هغه یو جهادي او سیاسی شخصیت دی، خو اوسنی حالتو ته په کتو شاید هلال دومره د پام وړ رایه تر لاسه نکړي،  دا  به  د حزب اسلامی تنظیم ته سخته صدمه ورسوي، مخالفینو ته به دا موقع په لاس ورکړي،  چې حزب اسلامي په سیاسی ډګر کې ماتې وخوړه په ملت کې محبوبیت نلري، که تاسو رښتیا غوښتل چې په دغه ډرامه کې ګډون وکړئ ،نو صحنې ته به مو په خپله رادنګلي وو، چې هم مو رایه اخیستی وای، اوهم مو دمناظرو چل نورو نوماندو ته ښودلي وای، تاسو خو د مناظرو په چل تر نورو ډیر ښه پوهیږي، زه په غالب ګمان سره ویلی شم، چې هم به مو د مناظرو میدان ګټلې واي هم به مو نورو نوماندو ته سخت سر خوږی جوړوو.‏،  که ډاکټر عبدالله عبدالله ،جنرال دوستم،استاد سیاف او زلمی رسول  رایه اخیستلی شي ،نو تاسو به د دوي  دوه چنده رایه اخیستي وه ستاسو  په ملت کې له دوی ډیر محبوبیت لرئ، خو قطب الدین هلال بیا دغه بخت نلري، که تاسو غوښتل چې په ټاکنو کې برخه واخلئ ،ټول کارونه مو باید د یو پلان په اساس ترتیب کړي وائ، کمپاین مو باید اوږد مهاله وائ،ددې هدف لپاره مو باید څوکاله پخوا مبارزه شروع کړي وای، د ولایتونو او ولسوالیو په سویه مو غوندې کړي وای خلک مو په ذهني ډول ټاکنو ته اماده کړي وای،  خپلې موخې مو ورته بیان کړي وای

۳.تاسو یو ښه عالم او یو ښه لیکوال یاست چې ډیر کتابونه مولیکلي دي، او د پښتو ژبې په ځولۍ کې مو اچولي دي، الله دې نورتوفیق هم درکړي چې همدا لړۍ ته  دوام ورکړئ، اوس  مو بعضې لیکنې په مستعارو نومونو شروع کړیدي لکه حقمل، ملا عبدالله  او داسې نور …

داسې لیکنې چې په مستعارو نومونو کیږي ښه نتیجه نلري، کوشش وکړئ چې لږ څه ولیکئ خو په  خپل  نوم يې ولیکئ اوس خلک پوهیږي چې حقمل او ملا عبدالله څوک دي؟

۴..په اجرایه  شورا کې ځوانانو ته ډیره برخه ورکړئ هم به کار وکړي او هم به د راتلونکي لپاره  وروزل شي ، اوس ځوانان د دې وړتیا لري ،چې خپل کارونه په ښه طریقه تر سره کړي. هغه پخواني تجربه لرونکي مشران دې  دوی ته یوازې لارښونه کوي او دوی به عمل کوي

۵.د ټول هغه جهادي قوماندانان چې د عنیمت وسلې یې خرڅې کړي دي او د تنظیم پیسې يې خپل مبارک جیب ته اچولي دی.

 له هغوي سره  حساب وکړه اوله  سیاسی مشرانو پوښتنه وکړه چې تاسو تنظیم لپاره څه لاس ته راوړنه لري ،چې مالوم شي څوک غل دي او څوک خدمتګار دی مونږ نه پوهیږو چې  زمونږ مشران دغه دومره لګښت له کومه کوي دوي ته دغه قیمتی موټر     او  د کور  لګښت له کومه راځي

۶.ښاغلیه مشره !خپل ځای ناستي  ته مویو بل وړ او  مناسب شخص وټاکئ ، داسې شخص چې له خدایه  ډاریږی اسلامي او ازاده مفکره ولري،هیواد پال وي،ښه سابقه ولري،  غل نه وي ، ستاسو نور خپل وخت  ذکر او فکر ته ورکړئ، هغه سهوې چې د کورونیو جګړو په وخت مو کړیدي له ملت  معافي وغواړي، تاسو سیاست یو ناکام سیاست وو ، ځکه  په ۴۰  کالنه مبارزه کې تاسو خپل هدف تر لاسه نکړ، یو قوي حزب مو په ضغیف  او په څو برخو مو وویشه نو مونږ ویلی شو چې ستاسو سیاست یو ناکام سیاست وو، کیدی شی تاسو ووایاست چې مونږ روس ته ماتې ورکړیدي، هغه تاسو میړانه  نه وه، تاسو خو هغه وخت  په اسلام اباد او پيښور کې په  قیمتي موټرو کې ګرځیدې  او سکیورټي ګارډ(ساتوونکي) به هم درسره وو، په سنګرونو کې خو  په دین  مین او غریب خلک پراته وو تاسو د هغوي قرباني ته ونه کتل هغوي حق مو وخوړ، د هغوی دغنیمت مالونه مو د ځان میراث کړل، چې وروسته بیا هغه مالونه  تاسود قوماندانانو  او د طالبانو میراث شو هغه اتلوالي  په دین او وطن مین ملت ګټلې ، چې ورته مبارک دې وي ، چې وروسته تاسو د هغو اتلانو په وینو تجارت وکړ، ښاغلیه مشره ! مرګ یو نا خبره میلمه دی،تاسو خو خپل رقیبان ولیدل چې څه شول؟ احمدشاه مسعود، استاد رباني او مارشال فهیم درته یادوم زمونږ او تاسو به هم یوه ورځ همدا  لار وی ، نو ښه به دا وي چې د عمر په  دې وروستۍ برخه کې یو نوښت وکړئ ، او له ملت بښنه وغواړي او په خپل ځای ناستی وټاکي

                                                          په درنښت

                                           د یو ازاد اوخپلواک افعانستان په هیله

        افغان محصل

——————————

په تاند کې د لیکوالو په نوم له خپرېدونکو لیکنو سره د تاند د دریځ یووالی ضروري نه دی.